Naalakkersuisut 2024-mi piumassuserinngisaminik meerartaarsinnaanngitsunut 3 mio. kr.-nik ikioorsiipput.

Peqqinnissaqarfiup piumassuserinngisaminik meerartaarsinnaanngitsunut IVF imal. ICSI (reagensglas atorlugu) atorlugit passutsinnernik neqerooruteqarnissaminut periarfissareqqilerpaa. Naalakkersuisut 2024-mut siullermik 3 mio. kr.-nik Danmarkimut reagensglas atorlugu passutsikkiartornissamut immikkoortitsipput. Ikiorneqarnissamut pisariaqartitsineq annertunerussappat siunertamut 2024-mut 5,7 mio. kr.-nik atugassanngortitsisoqaqqissinnaavoq.

Ullumikkut Peqqinnissaqarfik aappariinnut nammineq piumassuserinngisaminik meerartaarsinnaanngitsunut passutsittarnissamut killilimmik neqeroortarpoq, passutsinnermi ilaatigut angutip arnallu nammineq kissaatiginngisamik meerartaarsinnaannginnerat qulaajaaffigineqartarpoq, hormoninik nakorsaasersuineq aqqutigalugu katsorsaanermik aamma anisumik ikkussisoqartarluni. 

"Meerartaarsinnaanngitsut ajoraluartumik amerliartorput, aappariippassuillu meerartaarusukkaluarlutit eqqugaaqqapput. Taamaattumik Peqqinnissaqarfiup piumassuserinngisaminik meerartaarsinnaanngitsunut reagensglas atorlugu passunneqarsinnaalersitsinera nuannaajallannarpoq”, Peqqissutsimut Naalakkersuisoq Agathe Fontain taama oqarpoq.    

Meerartaarsinnaannginneq aappariit iluanni ajornartorsiutaaginnarnani inuiaqatigiit tamarmiusut eqqortarpaat. 
Passutsissinnaanerup periarfissanngornera Aningaasaqarnermut Akileraartarnermullu Ataatsimiititaliap piumassuserinngisamik meerartaarsinnaanngitsut reagensglas atorlugu passunneqarnissaannut aningaasartuutit matussuserneqartalernissaanik akuersineratigut iluatsippoq.  Aappariit reagensglas atorlugit passutsikkusuttut amerlassusaat nalorninartortaqarput, tassami peqqinnissaqarfik passunneqarnermut, nakorsaatinut, angalanermut najugaqarnermullu tamakkiisumik akiliilluni siusinnerusukkut neqerooruteqarsimanngimmat.

Peqqissutsimut Naalakkersuisoq Agathe Fontain oqaaseqarpoq, ”Peqqinnissaqarfiup passunneqarnissamut neqeroorut massakkut aallartissavaa ukiullu affaa qaangiuppat nalilersuisoqareerpat suliaritittarneq pillugu sukumiinerusumik pisariaqartitsineq nalilerneqarsinnaalissaaq. Tassami 2025-mut Aningaasanut Inatsit aqqutigalugu aalajangersimasunik aningaasaliisoqartalerneratigut reagensglas atorlugu passunneqarnissamut neqeroorutip ataavaartumik periarfissaalernissaa kissaatiginartikkaluaqigakku”.  

Reagensglas atorlugu passunneqarnissamut tulleriiaarineq Peqqinnissaqarfiup aappariinnut piumassuserinngisaminik meerartaarsinnaanngitsunut innersuunneqarnissamut piumasaqaataai malillugit ingerlanneqassaaq. Aappariit ukioq ataaseq sinnerlugu najugaqatigiittut tamarmillu meeraqanngitsut misissorneqarsinnaapput namminerlu kissaatiginngisamik meerartaarsinnaannginnermut katsorsarneqarlutik. Neqeroorut arnap 40-inik ukioqalernissaata tungaanoortarpoq, 38-inik ataallugilluunniit ukioqarluni innersuunneqarfimmiit nakorsamit takussutissiinikkut nammineq kissaatiginngisamik meerartaasinnaannginnermik katsorsaaneq aallartisarneqarsinnaavoq. 
Nakorsap naliliinera tunngavigalugu aappariit pingasoriarlutik Danmarkimi katsorsarneqarnissamik neqeroorfigineqarsinnaapput. 

Paasisaqarnerorusukkuit naalakkersuisup allattaa Birgithe Heinrich e-mailikkut: bihe@nanoq.gl imaluunniit oqarasuaatikkut ugguuna attaveqarfigineqarsinnaavoq: +299 34 66 17