AtuartigukKalaallit Nunaannut cyberikkut saassussisoqarsinnaanera suli navianaateqarpoq
Nassiussisuuvoq: Naalakkersuisut Siulittaasuata Naalakkersuisoqarfia
Center for Cybersikkerhedimit nalilersuinerit aallaavigalugit, Kalaallit Nunaannut nittartakkatigut isertorluni alapernaarsuinissamut, nittartakkatigullu pinerluuteqartoqarnissaanut navianaat suli qaffasissorujussuuvoq.
Kalaallit Nunaannut nittartakkatigut navianaataasinnaasut nalilersorneqarnerani Center for Cybersikkerhedemit misissorneqartut tassaapput – Nittartakkatigut isertorlutik alapernaarsuineq, nittartakkatigut pinerlunneq, ajortisaaraluni nittartakkatigut saassussineq, isummanik aalajangersimasumik nittartakkatigut siaruarterineq kiisalu nittartakkatigut peqquserlunneq.
Nittartakkatigut isertorlutik alapernaarsuisut assigiinngillat, taakkualu ilagaat hackerit, taakkualu qarasaasiaqarnermi atortunut elektroniskinullu allanuut paasissutissanik tillinniartarput. Center for Cybersikkerhedimiillu taakkununnga navianaat qaffasissutut nalilerneqarpoq.
”Naalagaaffiit Ruslandikkut aamma Kinakkut nunanut allanut, sillimaniarnikkut, illersornissaqarnikkullu
politikkimut soqutiginnittorujussuupput, soorlu aamma assersuutigalugu Kalaallit Nunaata naalagaaffeqatigiinnermut naalagaaffinnullu allanut attuumassusaannut tunngatillugu ilisimasassanik soqutiginnittut. Nittartakkatigut isertorluni alapernaaserniarnermi suliffeqarfinnut paasissutissanik qulaani taaneqartunik pigisalinnut navianaateqarnerusarpoq.” Kalaallit Nunaanni nittartakkatigut saassunneqarsinnaanermut nalilersuineq, qupp. 7
Center for Cybersikkerhedip naliliinera aallaavigalugu Kalaallit Nunaannut nittartakkatigut pinerluttoqarsinnaaneranut navianaat qaffasissorujussuuvoq. Nittartakkatigut pinerlunniarnermi aningaasatigut pinerluttoqartarpoq, taamaaliornermilu ilaatigut Phishing mails aallaaviusarput, taakkualu siunertaat tassaavoq tigusisussat sianiinaarlugit paasissutissanik pissarsiniarneq, soorlu isertaatit, kortit paasissutissaat paasissutissalluunniit allat mianernartut.
Aktøri tassaavoq inuk, inuit ataatsimoortut, aaqqissuussisimaneq aalajangersagaq aalajngersarsimanngittorluunniit imaluunniit naalagaaffik imaluunniit inuinnaq. Cyber-ikkut saassussinermi aktøri atorneqartarpoq illuatungeq, saassussiniarluni siunertaqartoq pilersaaruteqartorluunniit saassussineq iluatsinnissaanut imaluunniit saassussineq iluatsissimasoq, ingerlaartoq imaluunniit saassussineq aaqqissuussaq.
2023-p ingerlanerani Kalaallit Nunaannut nittartakkatigut saassussiniarnerit arlallit aqqusaarneqarsimapput. Kalaallit Nunaata Issittumi inissisimanera eqqarsaatigalugu Kalaallit Nunaat naalagaaffinnit naalagaaffiunngitsunillu soqutigineqarpoq, taakkualu sumiiffimmi politikkimut pisuussutinullu soqutigisaqartuupput.
Center for Cybersikkerhedip naliliinera aallaavigalugu ajortisaaraluni nittartakkatigut saassussisoqarnissaanut isummanillu aalajangersimasunik nittartakkatigut siaruarterisoqarnissaanut navianaat appasippoq.
Ataatsimut isigalugu saassunneqarsinnaanermut nalilersuinerup naqissuserpaa, Kalaallit Nunaanni nittartakkatigut saassussisoqarsinnaaneranut illersornissamut suli pitsaanerusumik iliuuseqartoqartariaqartoq. Cyberimi paasissutissanillu sillimaniarneq eqqarsaatigalugu Digitalinngortitsinermut Aqutsisoqarfik Center for Cybersikkerhedilu qanimut suleqatigiipput. Ukioq mannalu nittartakkatigut saassunneqarnissamut pinaveersaartitsisoqarnissaanut tunngatillugu pisortaqarfiit suliffeqarfiillu siunnersorneqarnissaat ilitsersorneqarnissaallu ukkatarineqartussaavoq. Taakkualu saniatigut Kalaallit Nunaanni innuttaasut nittartakkatigut sillimaniarneq pillugu qaammarsaavigineqarnissaat aallarnisartussaalluni.
Saassunneqarsinnaanermut nalilersuineq qallunaatut uani atuaruk: Kalaallit Nunaanni nittartakkatigut saassunneqarsinnaanermut nalilersuineq
Saassunneqarsinnaanermut nalilersuineq qallunaatut kalaallisullu aamma uani atuarneqarsinnaavoq: Naalakkersuisut nittartagaani
Paasissutissat sukumiinerusut piniarukkit attavissaq:
Digitalinngortitsinermut Aqutsisoqarfik:
Aqutsisoqarfiup pisortaa Katrine H. Nathanielsen digitalisering@nanoq.gl imalt. Oqarasuaat: +299 34 59 70
Center for Cybersikkerhedimut attavissaq FE-p tusagassiortunut saaffiginnittarfia aqqutigalugu: FEkommunikation@fe-ddis.dk imalt. Oqarasuaat: +45 2016 0593