Akileraartarnikkut akitsuusiisarnikkullu aaqqissuusseqqinneq piviusunngorpoq

Naalakkersuisut Inatsisartuni partiit marluk peqatigalugit akileraartarnikkut akitsuusiisarnikkullu aaqqissuusseqqinneq pillugu isumaqatigiissummik ullumi atsioqatigiipput.

Inuit Ataqatigiit Siumullu atsiortuupput. Isumaqatigiissut ima qulequtaqarpoq: “Nunarput najoruminarnerulersitsigu”

Isumaqatigiissummi sulinerup akilersinnaanerunissaa, nioqqutissat ilaasa akitsuuteqannginnerunissaat nunatsinnilu inuunerup akikinnerulernissaa ilaatigut qulakkeerneqarpoq.

Isumaqatigiinniartoq, Aningaasaqarnermut Akileraartarnermullu Naalakkersuisoq angusaminnik iluarisimaarinnippoq.

- Pisiassat arlallit ukiuni kingullerni akitsorsimaqaat. Tamanna innuttaasunut tamanut sunniuteqarnerluppoq. Aaqqissuusseqqinnitsigut innuttaasut pitsaanerusumik atugaqalerlutillu pisissutigisinnaasaminnik kaasarfimmioqarnerunissaat qulakkeerparput. Tamanna tamanut ajugaaneruvoq, Erik Jensen oqarpoq.

Nuna tamakkerlugu akileraarut nikissanngitsoq aaqqissuusseqqinnermi isumaqatigiissutaavoq. Inummut ilanngaat 60.000 koruuninngorpoq. Sulinermut ilanngaat 89 millionimit koruuninit 260 millionit koruunit missaanut qaffappoq. Ernianut ilanngaatit tamarmik, pensionit tunniunneqarnerini peqatigiiffinnullu ilanngaatit atuutiinnassapput. Ilanngaatit allat atorunnaassapput.

Aningaasaliissutit

Allannguutinut taakkununnga aningaasaliissutit 360 millionit koruunit isumaqatigiissuteqartut nassaaraat. Illuatungeriit aningaasaliissutissat sinneruttut 53 millionit koruunit akitsuutit allanngortinnerisigut aningaasaliissutaanissaat isumaqatigiissutigaat.

Suliap naammassinera Naalakkersuisut Siulittaasuata pitsaasutut isigaa.
- Suliarujussuaq, tassa akileraartarnikkut akitsuusiisarnikkullu aaqqissuusseqqinneq ullumi isumaqatigiissutigalugu atsiorparput. Aaqqissuusseqqinnerup innuttaasut atugaasa naligiinngissiartuinnarsimasut ilorraap tungaanut saannissaa qulakkeerinneqataaffigissavaa. Tamanna pingaaruteqaqaaq. Naligiinnerugutta ataatsimut ineriartorsinnaanerussaagut, Múte Bourup Egede oqarpoq.

Akileraartarnikkut allanngortitsineq kommuninut sunniuteqassaaq. Tamakkua ataatsimoorullugit, tassa kommunit ukiumoortumik tapiissutinik isumaqatigiinniarfigineqalerpata suliarineqassapput.

Apeqqutissaqartunut attavissaq: Aningaasaqarnermut Akileraartarnermullu Naalakkersuisup Allattaa, Nukaaka Tobiassen. nukat@nanoq.gl, 34 50 00.