Atuartiguk“Ulluinnanni ujarassiornerup sunniutai”
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Kinguaariinni nukarliunerusut Ujarassiorimmi ilanngutsinniarlugit, meeqqat atuarfianni unammisitsissaagut, tassani meeqqat atuarfianni atuaqatigiiaat tamarmik qaaqquneqarlutik. Atuaqatigiit karsiannut aningaasanik akissarsititsissaagut.
Sapaatip akunnerani sammisaqarfiusumi qulequtarineqarpoq: “Ulluinnanni ujarassiornerup sunniutai”
Qulequtaq
Atuartut eqqaasinneqarput teknologip nalaani inuusugut, tassanilu ujarassiornermit tunisassiat pinngitsoorneqarsinnaanngilluinnarlutik. Atuartitsinerup ingerlanerani atuartut oqariartuutigineqartut ilaquttaminnut ikinngutiminnullu namminneq periaasertik atorlugu ingerlateqqittarnissaat ilinniassavaat.
Meeqqat atuarfianni atuartut ulluinnarni elektroniskinik nutaaliaasunik atuisinnaapput, assersuutigalugu smartphonet aamma tabletit, qarasaasiatigut pinnguaatit, Youtube, Netflix, kisianni taakkuninnga atuisinnaanissamut suut pisariaqarnersut eqqarsaatiginngissinnaavaat. Tunisassiat atortussiartaanni ujarassiornermit tunisassiat pinngitsoorneqarsinnaanngilluinnarput. Atuartut taakkua atuartitsinermi itisilerlugit paasisaqarfigissavaat.
Atuartut tunisassiamik ataatsimik toqqaasinnaapput, assersuutigalugu smartphone, aammalu namminneerlutik smartphone sunik sanaajunersoq sukumiisortai iserfigissallugit (google, youtube il.il. aqqutigalugit).
Elektroniskini nutaaliaasuni ikkussukkat tamarmik ujarassiornermit tunisassianik aammalu ujarassiornermit tunisassiaannarnik atuiffiupput. Assersuutigalugu aatsitassarsiorfinni suliffissuarneersut saffiugassat, uuliasiornermut suliffissuarneersut tunisassiat inuit atortussiassaliaat, aatsitassat qaqutigoortut aatsitassarsiorfimmik ingerlatsinermi saniatigut tunisassiarineqartartut.
Piffissamut killigititat
Meeqqat atuarfianni atuartut atortussanut ilisimalikkatik atuarfigisaminni periarfissaritinneqartut atorlugit paasisatik saqqummiutissavaat, assersuutigalugu plakatit paasissutissiissutit, Powerpoint, Word, kingusinnerpaamillu ulloq 1. maj 2024 nallertinnagu nalilersorneqartussanngorlugit nassiutissallugit.
Akissarsisitsinissamut ataatsimiititaliap nalilersuereernerani atuartut kingusinnerpaamik ulloq 31. maj akissarsisinneqassapput. Sapaatip akunnerani sammisaqarfiusumi peqataasunik akissarsisitsineq tusagassiortunit malinnaaffigineqassaaq, aammalu Ujarassiorit aallartilernerani aallarniinermut atorneqassalluni.
Akissarsiassat
Akissarsiassat aningaasartai katillugit 10.000 koruunit agguarneqarput:- 5000kr
- 3000kr
- 2000kr
Meeqqanut atuagaq ”Kalaallit Nunaata Geologiia” sapaatip akunnerani sammisaqarfiusumi atortussatut atorneqarsinnaavoq.
Paasisaqarnerorusukkuit Pele Tobiassen, Ujarassiorimmut pisussanut pilersaarummut ujarassiuutut akisussaasuusoq e-mailikkut: pton@nanoq.gl attaveqarfigineqarsinnaavoq