Kujataani sillimmatitut qulimigooqartitsineq pillugu isumaqatigiissummik sivitsuineq

Kujataani sillimmatitut qulimigooqartitsineq pillugu massakkut isumaqatigiissutaasup 2024-mi marsip aallaqqaataanit, maajip 31-ata tungaanut sivitsornissaa pillugu, Ineqarnermut Attaveqaasersuutinullu Naalakkersuisoq Air Greenland A/S-imik isumaqatigiissusiorpoq.

Isumaqatigiissutaaqqaartoq 2023-mi decembarip aallaqqaataanit, 2024-mi februaarip 29-a ilanngullugu atuuppoq.

Ineqarnermut Attaveqaasersuutinullu Naalakkersuisoq, Hans Peter Poulsen, ima oqaaseqarpoq:

”Qulimiguulinnik sillimmateqartitsisimaneq, sikuunera patsisaalluni siornatigut unammillernartissimasatsinnut iluaqutaasimasoq paasillugu nuannaarutigaarput. Inissat amerlinerisigut angallassineq eqaannerusinnaasimavoq, taamaattumillu ukioq-manna Kujataani imaatigut angallatinik, qulimiguulinnillu angalasut piffissaq eqqornerullugu angalasinnaanerusimallutik. Piffissami matumani Kujataani suli sikuutillugu angallassinerup atatiinnarneqarnissaanut, isumaqatigiissummik sivitsuineq tapertaavoq.”

2022/2023-p ukiuunerani sikuunera patsisaalluni, imaatigut angallassineq pillugu kiffartuussinissamik isumaqatigiissutip qaammatini pingasuni atorunnaarsinneqarnera, qulimiguulimmik sillimmateqartitsinissaq pillugu isumaqatigiissuteqarnermut tunuliaqutaavoq. Air Greenlandip qulimiguuliutaata allakkanik, nassiussanillu qaavatigut assartuisussanngornermi saniatigut nunap immikkoortortaani ilaasunik angallassinissaq tamaat isumagisussanngormagu, ilaasunik angallassineq unammillernartunik nassataqarpoq.

Imaatigut angallassineq pillugu kiffartuussinissamik isumaqatigiissut sikuuneratigut angallassinerup oqilisaanneqarnissaa, isumaqatigiissuteqarnermi siunertaavoq. Angallassinermi ajornartorsiuteqartoqalissagaluarpat, qulimiguullit AS-350-it marluk atuleriaannanngorlugit Narsarsuarmiisinneqassasut isumaqatigiissutigineqarpoq. Qulimiguullit taakkua marluk tamarmik immikkut tallimanik ilaasoqarsinnaapput. Taakkununnga billitsit, nalinginnaasumik piumasaqaatit malillugit tuniniarneqassapput, tak. Air Greenlandimik kiffartuussinissamik isumaqatigiissut malillugu.

Air Greenlandimi pisortaaneq, Jacob Nitter Sørensen, ima oqaaseqarpoq:

“Sillimmateqartitsinermik isumaqatigiissummik illuatungeriit sivitsuiniarlutik aalajangernerat, isumaqatigiissuteqarnerallu pitsaavoq. Siorna Tunugdliarfik sikummat ingerlatsisinnaasimannginnermi, massakkutullu taamak sikuutillugu Kujataani imaatigut angalasoqarsinnaatinnagu misilittagaqarnermi, silaannakkut angallassinermi inissat amerlanerusariaqarput. Inuiaqatigiinni pingaarutilimmik suliassamik tassannga aalaakkaasumik ingerlatsinermik, pitsaanerusumillu kiffartuussinermik pilersitsisussamik Air Greenland kivitseqataasinnaagami nuannaarutigaa. Neriuutigiinnassavarput piffissami tassani silaannakkut angallassisinnaatilluta sila atoruminartassasoq.”

Kujataani qulimiguulimmik angallassinermut tapiissutit 2024-mi, 2025-milu qaffassallugit, 2024-mut Aningaasanut Inatsisissatut isumaqatigiissummi illuatungeriit isumaqatigiipput. Qaqortumi mittarfittaassap atulernissaata tungaanut, naleqquttumik kiffartuussinerup atatiinnarneqarnissaanut qaffaaneq qulakkeerissaaq. Taamaalilluni qulimiguulinnik sillimmateqartitsinissaq pillugu isumaqatigiissummik sivitsuineq aningaasanut inatsit pillugu isumaqatigiissummik, taamaalillunilu Kujataani qulimiguulimmik angallassinermik pitsanngorsaanissamik Naalakkersuisut kissaateqarneranut piviusunngortitseqataassaaq.

Isumaqatigiissutip iluaqutaanera nalilersorumallugu Naalakkersuisut DMI-p sikunik alapernaarsuiffianik, Air Greenlandimillu qanimut oqaloqateqarput, sikuuneralu suli malinnaaviginiarlugu.

Aallarfissanut billitsit, kiffartuussinissamik isumaqatigiissummi nalinginnaasumik piumasaqaatit malillugit tuniniarneqassapput.

Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl