Namminersorlutik Oqartussat sanaartornermi pilersaarutaasa ilaannik siuartitsineq

Sanaartornerup allanngorsimaneranut takussutissat arlaqarnerinik sanaartornermik suliaqartut nalunaaruteqarnerinik, Naalakkersuisut ilisimatinneqarput. Nunatsinni sumiiffinni arlalinni suliassaaleqisoqartoq nalunaarutigineqarpoq, sanaartugassallu ilaatigut ikiliartorpasillutik.

Sanaartornermi inissisimaneq pillugu sanaartortut nalunaarutaat Ineqarnermut Attaveqaasersuutinullu Naalakkersuisup Hans Peter Poulsen-ip asuliinnaanngitsutut tiguaa, pisorlu qanimut malinnaaviginiarlugu.

Naalakkersuisoq Hans Peter Poulsen ima oqarpoq;
”Sanaartornermik suliaqartunik ataavartumik oqaloqateqartarnissamik, pisortani sanatitsisutut qulakkeerinissarput pingaaruteqarpoq. Sanaartornerup ingerlalluarnissaa, nunatut annertuumik soqutigisaraarput. Sanaartorneq nunami suliassaqartitseqataammat, piginnaasanik ineriartortitseqataammat, inuusuttatsinnillu ilinniarsimasunik pigiinnartitseqataammat, nunap ineriartortinneqarnissaanut annertuumik pingaaruteqarpoq.”

Sanaartugassanik suliassinneqartartut, siunnersorteqarfiillu arlaqartut 2024-mi suliassaaleqinerminnik, inuillu ataasiakkaat pilersaarutaasa ikilinerinik nalunaaruteqartunik Ineqarnermut Attaveqaasersuutinullu Naalakkersuisoqarfik saaffigineqarpoq. Tamanna tunuliaqutaralugu teknikkikkut sulialinnut siunnersuisartunut, entreprisenullu Sulisitsisuni ataatsimiititaliat noqqaassutigaat, Namminersorlutik Oqartussat pilersaarutaannik siuartitsisoqassasoq.

Suliaqarfiup noqqaassutaa qisuariarfigalugu, pilersaarutip ’Ilinniartut ineqarfii nalinginnaasut Immikkoortoq 2, Nuuk’ neqeroortitsissutigineqarnissaata siuartinneqarnissaa, Naalakkersuisut 2024-mi februaarimi akuersissutigaat. Pilersaarut 2024-p ukiaani aallartinneqartussatut naatsorsuutigineqarluni neqeroorutigineqarpoq. Siuartitsinissaq iluaqutaassalluni pilersaarutinik allanik nukingernartoqarnersoq, Ineqarnermut Attaveqaasersuutinullu Naalakkersuisoqarfiup ataavartumik nalilersortassavaa.

Tassunga tunngatillugu paasissutissiissutigineqarsinnaavoq, Namminersorlutik Oqartussat 2024-mi sanaartornermi annertuunik pilersaaruteqassamaarlunilu, nutarterinissami annertuumik pilersaaruteqassamaarmat. Pilersaarutit taakkua sanaartornermi aamma suliassaqartitseqataasinnaasut naatsorsuutigineqarpoq.

Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl