AtuartigukKalaallimut arnamut nersorinnissut
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Nunarsuaq tamakkerlugu arnat ulluat kalaallit arnartaannut, inuiaqatigiitsinni pingaarutilimmik sunniuteqarsimasunut nersuiniarnissamut tunngavissiilluarpoq. Arnat Kalaallit Nunatta ineriartornerani assigiinngitsunik pingaarutilimmik inissisimallutillu ilapittuisimasut.
Navarana Arnarulunnguarlu piffissami arnat suliani angutit ingerlattagaanni peqataanermikkut sapiissutsimikkut aalajangersinnaassutsimikkullu ilisimaneqartut eqqaanngitsoorsinnaanngilagut. Angutit ilisimasassarsiornermi peqataasut naligalugit issittumi ilisimasassarsiornerni peqataapput, ilisimasassarsiornerillu iluatsilluarneranni pingaarutilimmik inissisimallutik. Arnat taakku nersorneqarlutillu oqaluttuarisaanermi inissaminnut eqqortumut inissinneqarnissaat naleqquttuuvoq.
Arnaq alla nersorneqartariaqartoq tassaavoq Elisabeth Johansen, ”Elisibannguaq”. Taanna arnani siullersaalluni Landsrådimut qinigaavoq, ukiullu 16-it ilaasortaalluni, Landsrådimiinnerminilu nunatsinni nunaqarfiit arlaqarnerusut matuneqarnissaannik pinngitsoortitsinermi aalajangiisumik inissisimavoq. Sunniuteqarnera ima sakkortutigivoq, allaat ”Landsrådip angutitatuaatut” taaneqartarluni – Landsrådini ilaasortat sinnerisa angutaannaanerini. Siuttoq takorluugalik, sunniuteqarneralu uagut oqaluttuarisaanitsinnut aamma sunniuteqartumi.
Ukiunilu kingulliunerusuni arnaqarpoq arlalinnik nersortarialinnut. Naja Lyberth arnallu allat spiralilersuisimanermik suliamut atatillugu oqaluttuassaminnik sassarlutik saqqummiussisut taakkununnga ilaapput. Taakku nukittunerisa oqaluttuarisaanitsinni kapitali avaanngunartoq tamatsinnut qulaajarneqarsinnaanngortippaa. Taakku tunngaviusumik pisinnaatitaaffimminnik naapertuilluarnermillu sorsuuteqarnerat tamatta sorsoqataaffissaraarput.
Taasinnaasallu arlaqarput, qanga pisimasut ullutsinnilu pisimasut. Arnat malunnaatillit tassaaginnanngillat nutaarsiassatigut saqqummertartut. Arnanit sunniuteqarluartunik avatangersimaneqarpugut. Ilaat politikimi sunniuteqarput, ilaat piffimmi najukkaminni, ilaallu ilaquttaminni, tassanilu katersuuffiullutillu maligassiuisuupput.
Arnat angutit naligalugit iniartornitsinnut sunniuteqaqataasimapput, naak taakku oqaluttuassartaasa atuakkanut oqaluttuarisaanermik imaqartunut ilanngullugit allanneqartarnerannik periuseqartoqarsimanngikkaluartoq. Piffissami naligiissitaanermut akerlilersuinerup ajoraluartumik suli annertuumik inissisimaffigisaani, ataatsimoorluta tamatta immitsinni, siulitsinnilu nukimmik nassaarluta ataatsimoornissarput aatsaat taamak pingaaruteqartigilerpoq. Arnat ulluanni ullorsiorluarisi!
Paasissutissat erseqqinnerusut pillugit naalakkersuisup allattaa Jeanette L. Petersen,
jalp@nanoq.gl, oqarasuaat: 34 52 06 atorlugit attavigiuk.