Naqqiineq: Naalakkersuisut meeqqat inuusuttullu isigiarsuttut salliutippaat

Naalakkersuisut Synscenter Refnæsimik isumaqatigiissuteqaqqinnissaq kissaatigigitsik Meeqqanut Inuusuttunullu Naalakkersuisoq § 37 naapertorlugu akissuteqaammini allappoq. Taamaattorli § 37 naapertorlugu akissuteqaat siullermik naalakkersuisoqarfimmut kukkusumut nassiunneqarsimammat akissuteqaat sivisuumik utaqqineqarsimavoq.

Inatsisartunut ilaasortap, Aqqalu C. Jerimiassenip, tappiitsunut isigiarsuttunullu siunnersuisarnermut tunngatillugu § 37 naapertorlugu apeqquteqaatini, 28. novembari 2023-mili nassiunneqarsimasoq, suli akissuteqarfigineqarsimanngitsoq nittartakkatigut nutaarsiassaqartitsivimmi Sermitsiaq.ag-mi atuarneqarsinnaavoq.

§ 37 naapertorlugu apeqqut qangalili Naalakkersuisunut nassiunneqarsimasoq ilumoorpoq. Apeqquteqaalli siullermik Meeqqanut Inuusuttunullu Naalakkersuisoqarfimmuunngitsoq naalakkersuisoqarfimmulli kukkusumut nassiunneqarsimanera naqqiissuteqarfigineqassaaq.

Aatsaat ulloq 13. februaarimi Meeqqanut Inuusuttunullu Naalakkersuisoqarfiup § 37 naapertorlugu apeqquteqaat tiguaat tamatumalu kingorna akissuteqaat suliarineqarpoq ullorlu 5. marsi Inatsisartunut nassiunneqarluni.

Naalakkersuisut isumaqatigiissuteqaqqinnissamik siunniussipput
Ukiumi nutaami 2022-mi Synscenter Refnæsimik isumaqatigiissuteqarneq naammassivoq. Meeqqanut inuusuttunullu isigiarsuttunut ikiorsiinissaq ukkatarineqartoq Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede erseqqissaavoq:

”Meeqqat inuusuttullu isigiarsuttut suliassaqarfittut pingaarutilerujussuartut isigaara tamannalu pingaarnersiuinermi salliutittorujussuuara, taamaattumik Naalakkersuisut Synscenter Refsnæsimik isumaqatigiissuteqaqqinnissartik kissaatigaat. Isigiarsuttunut sullissivik pingaarutilimmik immikkut ilisimasaqarluarpoq, tamakku nunami maani suli piginngilagut. Nunatsinni suli inissinneqarsimanngitsunik Synscenter Refsnæs peqarmat Synscenter Refsnæsimik isumaqatigiissusiornissarput pisariaqartipparput, taamaaliornikkut piffissaq ungasinnerusoq isigalugu tappiitsunut isigiarsuttunullu siunnersuisarneq eqqarsaatigalugu immikkut ilisimasanik katersisinnaavugut,” taama oqarpoq Naalakkersuisoq Aqqaluaq B. Egede.

Naalakkersuisut Synscenter Refsnæsillu isumaqatigiissutissaanni ilaatigut Synscenter Refsnæsip Pissassarfimmi pikkorissartitsineratigut atuarfinnut siunnersuisarnerit ilitsersuisarnerillu aamma ilaassapput.



Attavissaq
Sukumiisumik paasisaqarusukkuit naalakkersuisup allattaa Rosa Thorsen e-mailikkut rose@nanoq.gl imaluunniit oqarasuaatikkut: +299 34 50 00 attavigiuk.