Savalimmiut pingaarutilimmik suleqatigaarput

Aalisarnermut Piniarnermullu Naalakkersuisup Kim Kielsenip Savalimmiuni aalisarnermut Naalakkersuisoq Dennis Holm, pingasunngornermi februaarip 28-anni 2024-mi ataatsimeeqatigivaa.

Ataatsimiittut isumaqatigiissutigaat Naalakkersuisut siulittaasuata Savalimmiunilu Lagmandip, Naalakkersuisut siulittaasuata 1997-imi tunngaviusumik isumaqatigiissutaat nutarterlugu aallartinneqassasoq. Siunertaavoq suleqatigiinneq pillugu 2025-mi isumaqatigiissusiortoqassasoq, Naalakkersuisut siulittaasuisa isumaqatigiissutaat tunngavigalugu.

Kim Kielsenip aamma Dennis Holmip oqaluuserisaasa ilagaat suleqatigiinnerulernissamut periarfissat aalisarnermilu ilisimasat pillugit avitseqatigiittalerulernissaq, taakku nunanut iluaqaataassammata. Aamma suleqatigiinnissaq pillugu isumaqatigiittarnerit kiisalu nunanut allanut isumaqatigiissuteqarnerit aamma oqaluuserineqarput.

“Marluulluta nunat najukkagut tassaapput aalisarneq pingaarnerpaatillugu inuussutissarsiutillit, taannalu tunngavigalugu iluaqutigalugulu immitsinnut ilinniaqatigiissinnaavugut, inuttunerpaannginnattalu anguniagassat ilaat pillugit aaqqiissutissarsioqatigiissinnaassaagut.
Taamaattumik isumaqarpunga suleqatiginnitsigut pissarsilluassalluta aamma ilisimasanik paarlaaseqatigiittarnitsigut, Aalisarnermut Piniarnermullu Naalakkersuisoq Kim Kielsen Savalimmiuni aalisarnermut naalakkersuisumut ilaatigut oqarpoq.

Savalimmiut pingaarutilimmik suleqatigaarput, soorlu aamma nunavut marluullutik isumaqatiginninniaraangata, aamma Kunngeqarfimmi Danmarkimi suleqatigiinnitsigut. Taamaattumik nuannaarutigaara naalakkersuisutigoortumik suleqatigiinnitta aamma attaveqatigiinnitta nukittorsarneqarnissaanut periarfissaqaratta.”

Savalimmiuni Naalakkersuisuni ilaasortaq Dennis Holm nunatsinnut februaarip 27-annit 29-annut tikeraarpoq. Paasisassarsiorfigalugit pulaagaasa ilaat tassaapput Pinngortitaleriffik aamma Kalaallit Nunaanni Aalisarsinnaanermut Akuersissutinik Nakkutilliisoqarfik.


Attavigineqarsinnaavoq Aaliarnermut Piniarnermullu Naalakkersuisoqarfik. E-mail: apn@nanoq.gl