Kalaallit Nunaata OCTA-mi siulittaasuunini allamut tunniuppaa

Nunat nunanit EU-mi ilaasortaasunit nunasiaataasimasut suleqatigiiffiani (OLT) siulittaasuunermik EU-mut, OCTA-mut tunniussineq ministerit ukiumoortumik isumasioqatigiinneranni pivoq. Ministerit isumasioqatigiinnerat Bruxelles-imi ulloq 28. februar 2024-mi ingerlanneqarpoq, tassani nunat nunanit EU-mi ilaasortaasunit nunasiaataasimasut suleqatigiiffiani OCTA-mi siulittaasuutitaqarneq Aruba-mut tunniunneqarmat.

Naalakkersuisut sinnerlugit Naalagaaffinngornissamut Nunanullu Allanut Naalakkersuisoq, Vivian Motzfeldt, ministerit isumasioqatigiinneranni qaaqqusisututtaaq peqataavoq. Isumasioqatigiinnerup naammassinerani politikkikkut nalunaarutissaq aammalu allaffissornikkut isumaqatigiissutissat nunanit OLT-mut ilaasortaasunit akuersissutigineqarput. Politikikkut nalunaarummi Aruba-p siulittaasuutitaqarnermini pingaartitassai allaaserineqarsimapput allaffissornikkut isumaqatigiissummilu OCTA-mi siulersuisut katitigaanerat, aningaaqarneq il.il. allaaserineqarsimallutik.

Kalaallit Nunaat 2022-mi novembarimili nunat OLT-mi ilaasortat sinniisuattut akisussaaffeqarsimavoq, tamatumalu kingorna Ny Kaledonien siulittaasuutitaqalerluni.

OLT-EU Forum
Naalagaaffinngornissamut Nunanullu Allanut Naalakkersuisup Vivian Motzfeldtip Nunat tamalaat suleqatigiinnerinut EU-mi kommissæri Jutta Urpilainen ulloq 29.februar 2024-mi ataatsimeeqatigaa. Kommissær Urpilainen oqallinnissamut Europa Kommissionip illorsuani ilisimaneqarluartumi Berleymont-imi ingerlanneqartumi qaaqqusisuuvoq. Oqallitsitsineq ukioq tamaasa pisartoq nunat OLT-mi ilaasortat naalakkersuinikkut aallartitaanit, Europa-Kommissionimit, Nunanit EU-mi ilaasortaatitaqartunit allanillu peqataaffigineqartarpoq aaqqissuussamilu suleqatigiinneq oqallisigineqartarluni.

Naalagaaffinngornissamut Nunanullu allanut Naalakkersuisoq Vivian Motzfeldt oqarpoq:
“Nunat EU-mi ilaasortaasunit nunasiaataasimasut suleqatigiiffiani ilaasortat brexit-ip kingorna unammilligassaqarsimapput, nunat OLT-mi ilaasortat ikileriagaatsiarsimammata. Nunat OLT-mi ilaasortat attaveqaqatigiittarfiata minnerunngitsumik EU-mut pingaaruteqaqisup OCTA-p sulinerata ingerlaannarnissaata qulakkeernissaa sulissutigissallugu Kalaallit Nunaanit pingaartinneqarsimavoq. OLT-EU-mi oqallitsitsineq naammasseqqammersoq suliniaqatigiiffimmut isumallualersitsivoq, OCTA-mi minnerunngitsumik EU-mi suleqatigisanik ataatsimeeqateqarnigut pitsaasumik ingerlammata.”

Annertunerusumik paasisaqarusuttut Naalakkersuisup allattaa, Naasunnguaq Beck Kristensen, e-mail nabk@nanoq.gl mobil +299533684 aqqutigalugu saaffigisinnaavaat