Múte: Tamatta assigiimmik naleqarpugut

Marlunngornermi unnukkut imminut toqunnissamik pinaveersaartitsineq pillugu periusissiaq Qamani Ilulissani Sermermiuni saqqummiunneqarpoq. Periusissiaq inuusuttut qaminut suleqatigalugit suliaavoq.

Naalakkersuisut siulittaasuat Múte Bourup Egede ammaanersiorluni oqalugiarpoq ilaatigullu ima oqarpoq: Qamani – Imminut toqunnissamik pinaveersaartitsineq pillugu periusissiaq saqqummiunneqarneranut tikilluangaaritsi.

Inuusuttup oqariartuutigisimasaa aallarniutigilaassavara:”Suna tamaat inuttut tigusariaqanngilat, kinaluunniit kukkusinnaatitaavoq. Kukkunikkut ilikkangaqartaratta. Nunarsuarmiikkavit tunissutaavutit, eqqaamallugu. Isumaqarniaqinak annertuumik suliaqaruit aatsaat naleqartutit. Naleqassutsit taannaajuaannarpoq angingaartoq”.

Oqaatsit ilumoortut. Oqaatsit imartuut. Oqaatsit attortinnartut. Ilumoormammi, tamatta assigiimmik naleqaratta.

Periusissiami inuusuttut misilittagaat pisariaqartitaallu qitiutinneqarput.

“Inuusuttut innersuussutaat tusarnaaqqissaarpagut. Sassarnissassinnut sapiissuseqarsimavusi. Inuttut ammarlusi ajornarnerpaat qajannannerpaallu pillugit oqaluttuarsimavusi. Paquminartut paquminarunnaarsissimavasi. Maligassiuisutut isigaassi. Oqariartuutigisasi periusissiamik annertuumik pisariaqartumillu pilersitseqataammata qujaffigerusuppassi”, Múte Bourup Egede ilaatigut oqarpoq.

Periusissiaq pitsaasumik peqataatitsinermillu aallaaveqartumik suliaavoq. Meeqqat pisinnaatitaaffii pillugit sullissivik, MIO, periusissiornermi suleqatigineqarput. Periusissiami maanna saqqummertumut inuusuttatta nunatsinni imminut toquttarnermut pinaveersaartitsinissamik innersuussutaat ilanngunneqarput.

Sukumiinerusumik paasisaqarusukkaanni Naalakkersuisut siulittaasuata allattaa Niels Dorph saaffigineqarsinnaavoq, ndor@nanoq.gl