Puukunik utertsisarnerup iluarsiiffigineqarnerata kingunerisaanik sodavandit immiaaqqallu akii pillugit oqaaseqaat

Naalakkersuisuniit oqaaseqaammi matumani sodavandit immiaaqqallu akiisa qaffannerisa kingunerisaanik inuiaqatigiinni tusagassiorfinnilu oqallinneq maanna ingerlasoq tunngavigineqarpoq. Naalakkersuisut naliliinerat malillugu sodavandit immiaaqqallu akiinut maanna atuuttunut akitsuutit qaffasissusiinut tunuliaqutaasutut kisimik nassuiaatigineqarsinnaanngillat. Oqaaseqaat Nunalerinermut, Imminut Pilersornermut, Nukissiutinut Avatangiisinullu Naalakkersuisup Kalistat Lundip oqaaseqaataanik imaqarpoq.

Naalakkersuisut immiaaqqat sodavandillu akikinnerulernissaannik neriorsuisimanngillat
Naalakkersuisuniit nassuerutigineqassaaq, UKA2022-mi aalajangiiffigisassatut siunnersuut aqqutigalugu poortuutinut nalunaarutip allanngortinneqarnissaa – taamaalillunilu sodavandit immiaaqqallu akikinnerulernissaat – kissaatigineqarsimammat. Naalakkersuisuniit suliap ingerlanerani siusissukkut poortuutinut nalunaarutip allanngortinneqarnerani inuussutissarsiutinik ingerlataqartunit akit qaffassanngitsut naatsorsuutigineqartoq paasineqarpoq. Naalakkersuisut ilaatigut Brugsenip suliffeqarfimmiit akit appasinnerulernissaat suliffeqarfimmiit naatsorsuutigineqartoq pillugu oqaaseqaatai tunngavigalugit taamatut ilimasuttoqartoq paasivaat . Taamatuttaaq Naalakkersuisuniit Nuuk Imeq A/S-ip suliffeqarfimmik matusiniarluni aalajangiinerat tunngavigalugu naliliipput. Suliffeqarfik nammineerluni ukiut nikinnerisa kingorna unammillersinnaajunnaarnissaminnik naliliinini tunngavigalugu taamatut aalajangiivoq, sodavandinut immiaaqqanullu akit appasinnerulernissaat naatsorsuutigigamikku. Kiisalu Copenhagen Economics misissueqqissaarpoq , tassanilu pingaarnertut inerniliissutigineqarpoq, inuiaqatigiit kalaallit puukunik utertitseriaasiusimasoq atorlugu unammilleqatigiinnermi pissarsiassanik arlalinnik pinngitsuuisimasoq. Tamatuma saniatigut misissueqqissaarnermi inerniliisoqarpoq, pisariillisaaneq atuisunut arlalinnik iluaqutissartaqassasoq ilimanaateqarsinnaasoq, tassungalu sodavandit immiaaqqallu akikinnerulernissaat ilaatinneqarpoq.

Akit appasinnerulernissaat ilimanaateqaraluartoq, tassungalu ilanngullugu akit appasinnerulernissaannik niuertarfiit namminneerlutik naatsorsuutigisaqaraluartut, Naalakkersuisuniit kalaallinut atuisunut immiaaqqat sodavandillu akikinnerulernissaat neriorsuutigineqarsimanngisaannarpoq. Taamaattumik Nuuk Imeq A/S-ip naalakkersuinikkut neriorsuutinik eqquutsitsinngitsoortoqarnera, aammalu kusanaatsuliortoqarnera pillugu Atuagagdliutit-nut (AG) oqaasia ilumuunngilluinnarpoq. Tassunga assersuutitut inerniliinerup aamma aviisip saqqaani pisariillisaanerup kukkusumik ingerlanneqarsimanerarneqarnera naapertuutinngilaq eqqortuunanilu.

”Naalakkersuisuniit ulluinnarni pisiassat akiinik aqutsisinnaanngilagut, aqutsissanngilagut aammalu taamatut kissaateqanngilluinnarpugut. Taamanikkut immiaaqqanik sodavandinillu tikisitsisarnissaq ammaanneqarmat Naalakkersuisuniit akit ilisimaneqanngillat – taamaattumillu soorunami aamma akit qaffasissusissaat qulakkeerlugit oqaaseqarfigisinnaanngilagut. Kisiannili nalunngilarput, Nuuk Imeq annerusumik unammillerneqalernissani peqqutigalugu matuniarluni aalajangertoq, aammalu niuertarfinniit sullissisut 2022-mi novembarimi akit appasinnerulernissaannik naatsorsuutigisaqarlutik oqaaseqartut. Ilaatigut tamakku peqqutigalugit 2023-mi ukiakkut KNR-imut oqarpunga, “naagga, akisunerulernissaat naatsorsuutiginngilara, aammali akikinnerulersitsinissaq siunertaanngilaq”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq

Maanna akinut atuuttunut nassuiaatitut akitsuutit tunngavigineqarsinnaanngillat

Naalakkersuisuniit naatsorsuititsivugut (tak. matuma kinguliani allassimasut), taakkunanilu sodavandimut Faxe Kondi-mut, 1,5 literimik imalimmut akitsuutit qaffasissusii takutinneqarput. Tabelimi kisitsisini takutinneqarpoq:

• sodavandi Faxe Kondi pisiniarfinni 50 koruuninik + puaa tunineqarnermini akia
• sodavandimut Faxe Kondi-mut taamaattumut akitsuutit allaffissornermullu akiliutit 14,75 koruuniupput
• pisiniarfiit pisinermut, nassiussinermut, passussinermut aningaasartuutinut pissarsiassanullu 35 koruuninik akiliisarput

Akitsuutit qaffasissusii – pingaartumillu puukunut akitsuutit – niuertarfinniit pisiniarfinni akit qaffasinneri pillugit apeqqutilliisoqaraangat arlaleriarluni akissutitut saqqummiunneqartarput. Kisiannili Naalakkersuisut inerniliinerat malillugu sodavandinut akinut maanna atuuttunut akitsuutit tunngavigineqarnerat nassuiaatigineqarsinnaanngitsoq. Inerniliineq akiviusut akitsuutit qaffasissusiinik illuatungilerlugit naatsorsukkanik tunngaveqartutut oqaatigineqassaaq.

”Aammaarlunga erseqqissaatigissavara, Naalakkersuisuniit ulluinnarni pisiassat akiinik aqutsinissaq aalajangersaanissarlu kissaatigineqanngimmat. Niuertarfiit kisimik tunisassamik qanoq akeqarnissaannik aalajangiisussaapput. Taamatut atugassaqartitsineq ataqqineqassaaq, inuussutissarsiortut niuernermi atugassarititaasut tunngavigalugit sulisussaammata”, Naalakkersuisoq Kalistat Lund naggasiivoq.

Niuertarfinniit ukiut kingulliit ingerlanerini poortuutinut akitsuutit peerneqarnissaannik uteriillutik kissaateqartarsimammata, poortuutinut akitsuutit atorlugit avatangiisinut peqqissutsimullu siunertanut tapertaasarnerat puigorneqarpoq. Imeruersaatit tikisinneqartartut amerliartortillugit eqqakkat peqqissutsimullu sunniutit pillugit unammillernerit annertusiartortussaapput. Naalakkersuisut isumaqarluinnarput – soorlumi niuertarfiit namminneerlutik taamaappasittut – innuttaasut aningaasaqarnikkut atugaat pitsanngortinneqartariaqartut. Taamaattumik Naalakkersuisuniit oqaatigineqartarpoq, maannalu erseqqissaatigineqaqqissalluni, poortuutinut akitsuutit naggataagut innuttaasunut iluaqutaanissaat siunertarineqarmat.

Annertunerusumik paasisaqarusunnermi naalakkersuisup allattaa Manasse Berthelsen tlf.: 34 56 03/54 88 68-imut imaluunniit på e-mail: pan@nanoq.gl aqqutigalugu attaveqarfigineqassaaq.

Assersuut: Sodavandi 1,5 literimik imalik (Faxe Kondi)
Poortuutissanut akitsuut UKA2023-imi 20 mio. koruunit nalinganut appartinneqarmat, Inatsisartuni partiinit amerlanerussuteqartunit tapersersorneqarpoq.