AtuartigukTakornariaqarneq pillugu sumiiffinni attaveqaasersuinermut aningaasaliissutinik pilersitsineq
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Asseq: Lisa Germany, Visit Greenland
Kalaallit Nunaanni sumiiffinni attaveqaasersuinermut annikitsunut ineriartortitsinissamut Danmarkimi naalakkersuisut 2023-mit 2026-mut 9,5 mio. kr.-inik aningaasaliivoq. Aningaasaliissutit sumiiffinni attaveqaasersuinernut annikitsunut atorneqassapput, soorlu aqqusernit, pisuffissat, takornariarfissat, allagartalersuinerit, perusuersartarfiit assigisaallu.
Naalakkersuisunit aningaasaliissutit aqunneqassapput, kommunilli sumiiffinni suut pisariaqartinneqarnersut ilisimavaat. Taamaattumik kommunit suliniutigerusutaminnik toqqaassapput, Naalakkersuisunullu qinnuteqassallutik.
”Nunarput kusanartoq, pissanganaqisumillu kulturilik nunarsuarmioqatitsinnut siammarterusupparput. Takornariaqarnerli piujuartitsinermik tunngaveqartariaqarpoq. Inuiaqatigiit sumiiffinniittut malinnaasinnaasariaqarput, pinngortitaq ajoquserneqassanngilaq nunatsinnilu inuussutissarsiorfiit allat artukkerneqassanatik. Taamaattumik ukiap ingerlanerani Naalakkersuisut takornariaqarnerup iluani sinaakkutissanik inatsisissatut siunnersuutinik saqqummiissamaarput. Suliniuteqarnissamut Danmarkimi aningaasaqarnermut inatsimmit aningaasaliissutit iluaqutaassapput, aningaasaliissutimmi pinngortitarput mianernaqisoq illersortussaavaa, qulakkiissallugulu takornarissat sumiiffinnilu najugaqartut nuannernerusumik misigisaqarnissaat. Aningaasat atornissaat erinisuutigeqaarput,” taama oqarpoq Inuussutissarsiornermut, Niuernermut, Aatsitassanut, Inatsisit Atuutsinneqarneranut Naligiissitaanermullu Naalakkersuisoq, Naaja H. Nathanielsen.
Kommunit qinnuteqaataat Naalakkersuisunut kingusinnerpaamik 1. april 2024 tunniunneqariissapput. Paasissutissat sukumiinerusut ilitsersuutillu kommuninut takornarialerinermillu ataqatigiissaarisunut (DMO) nassiunneqassapput.
Inuussutissarsiornermut, Niuernermut, Aatsitassanut, Inatsisit Atuutsinneqarneranut Naligiissitaanermullu Naalakkersuisoqarfik uunga attavigineqarsinnaavoq mail: isiin@nanoq.gl & oqarasuaat +299 34 50 00.