![](/-/media/naalakkersuisut/hans-peter-poulsen/hans_p_poulsen.jpg?cx=0.5&cy=0.5&cw=975&ch=415&hash=5AA91A3B839A4EDD23B408AD10BF2D04)
”Naalakkersuisut siunnerfigaat silaannartatta nakkutilliiveqarfia Nuup avataaniissasoq” pillugu ilanngutassiaq www.sermitsiaq.ag-p januaarip 31-ani saqqummiuppaa.
Ilaatigut ima allassimasoqarpoq, ”Ullumikkut silaannartatsinnik nakkutilliineq naalagaaffiup akiligaanik Canadamit aammalu Islandimit isumagineqarpoq. 2031-miilli Kalaallit Nunatta nakkutilliineq ingerlatilertussaavaa, sulili Danmarkip akilersorlugulu akisussaaffigissavaa.”
Ingerlatsineq Namminersorlutik Oqartussanut tunniunneqassanersoq oqaasertaliussaq nalornilersitsimmat, Kalaallit Nunaata silaannartaanik nakkutilliineq Danmarkimi Naalagaaffiup Naviair-imut tunniunniarmagu, angallattunillu nakkutilliivik Kalaallit Nunaanniissammat erseqqissaatigineqartariaqarpoq.
Naalakkersuisoq Hans Peter Poulsen ima oqaaseqarpoq:
”Kalaallit Nunaata silaannartaanik nakkutilliinerup Canadamit, Islandimiillu tiguneqarnissaa, tassungalu atatillugu Kalaallit Nunaanni silaannartamik nakkutilliinerup ineriartortinneqarnissaa Danmarkip sulissutigaa. Naviair-ip nakkutilliineq tigussagaa pilersaarutaavoq. Tamassumap pinissaa, nunatsinnilu piginnaasanik suliffinnillu pilerinartunik amerlanerusunik ineriartortitsisinnaanissapput qilanaaraara. Inuusuttatta ilinniarnissaannut tamanna aamma periarfissaqarnerulersitsissaaq.”
Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl