Múte: Tasiilami aalisakkerivissaq tamanut pitsaavoq

Tasiilami aalisakkanut tunitsivissap toqqavissaa ullumi nivariaqqaarneqarpoq.

Naalakkersuisut Siulittaasuat, Múte Bourup Egede, ullormi pingaarutilimmi Tasiilami najuulluni peqataavoq.

- Tasiilami aalisakkanut tunitsiveqarnissaq ukiorpassuarni kissaatigineqarpoq. Maanna sanaartorneqalerpoq. Siunissaq qaamasoq suli qaamanerulerpoq. Ineriartussaagut soorunami aamma nunatta kangiani, Múte Bourup Egede oqarpoq.

Aalisakkanut tunitsivissaq Namminersorlutik Oqartussat ingerlatseqatigiiffiutaata, Royal Greenland A/S-ip sanaartortippaa.

Tunitsivissaq piareerpat ataavartumik suliffiit pilersinneqassapput.

- Aalisartut pisasi avammut tunineqarpata sulisartullu sulippata nunatta karsianut, minnerunngitsumillu illoqarfissinnut nunallu immikkoortuanut maanga pitsaasumik kinguneqassaaq. Taamaattumik Naalakkersuisut aalisakkanut tunitsiviliornissamut peqqusinerat inuiaqatigiinnut tamanut ajugaaneruvoq, Múte Bourup Egede oqarpoq.

Royal Greenland A/S-imi siulersuisut siulittaasuat, Maliina Abelsen, aalisakkanut tunitsivissap toqqavissaanik nivariaqqaartuuvoq.

Nivariaqqaartoqareermat Tasiilami inuttaasunut tamanut katersortarfimmi kaffillertoqarpoq.

Inatsisartut Inuussutissarsiornermut Aatsitassanullu Ataatsimiititaliaanut ilaasortat Kommuneqarfik Sermersuumilu qinikkat aamma peqataapput.