Qeqqata Kommuniani akiliuteqarluni aalisartitsisarnermut akuersissutinik tunniussineq

Assitaa: Visit Greenland-imit

Matumuuna Naalakkersuisut nuannaarutigalugu nalunaarutigaat Qeqqata Kommuniani suliffeqarfiit pingasut, takornarissanut akiliuteqarluni aalisartitsinermut akuersissutinik sisamanik tunineqarmata.

Takornarissanut sullissinissamut akuersissutinik tunineqartut tassaapput:

Inussuit Lodge I/S Maniitsup avannaani, Tunup Kangerluata nalaani Narsaaqqami
Nipi FM-Maniitsoq Aps Maniitsup kujataatungaani kangiata kangerluaniittut Amitsuarsummi Qooqqunilu
Trophy Hunting Greenland ApS Kangerlussuup kujataani Angujaartorfiup Kuuani

Takornarissanut sullissinissamut akuersissutit 1. januar 2024 atuutilersinneqarput, ukiullu 5 atorneqarsinnaallutik, tamatumalu kingorna sivitsuisoqarsinnaalluni.

Takornarissanut akiliuteqarluni aalisartitsisinnaanermut akuersissutinik tunniussisoqarneratigut naatsorsuutigineqarpoq, akuersissutinik piginnittut takornarissanut neqeroorutigisinnaasaminnik pitsanngorsaassasut. Taamaaliornikkut takornarissat amerlanerulersinnaassapput aammalu sumiiffiup nalaani ineriartortoqarlunilu suliassaqarnerulissaaq.

”Suliffeqarfiit pingasuusut akuersissutinik pissarsinerinik pilluaqqungaarpakka, neriuppungalu Qeqqata Kommuniani akiliuteqarluni aalisartitsisinnaanermut akuersissuteqalerneratigut sinaakkutit pitsaasut pilersinneqarumaartut”. Taama oqarpoq Naalakkersuisoq Naaja H. Nathanielsen.

Takornarianik sullissisinnaanermut akuersissutinik nunatsinni takornariaqarnermi ineriartortitsinissamut pingaaruteqartorujussuupput. Taannalu peqqutaalluni, takornarissanik sullissisinnaanermut akuersissutinik sumiiffimmi tunniussineq tunngavigalugu, akuersissutinik pissarsisut, ingerlatassaminnik ineriartortitsisinnaanissaminnut aningaasaliisinnaalissapput.

Sukumiinerusumik paasissutissat uunga piniarneqarsinnaapput: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik e-mail: isiin@nanoq.gl, imaluunniit oqarasuaat +299 34 50 00.