AtuartigukKapisillit naligiissitaanerlu
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Inuussutissarsiornermut, Niuernermut, Aatsitassanut, Inatsisit atuutsinneqarnerannut Naligiissitaanermullu Naalakkersuisup Naaja H. Nathanielsenip oqaaseqaataa
Nunat Avannarliit misissuinerat ‘Kapisillit Naligiissitaanerlu’, nunani avannarlerni aalisarnermik imarsiornermillu inuussutissarsiortuni suiaassutsikkut oqimaaqatigiinnginnermik sammisaqarfiusoq ullumikkut saqqummiunneqarpoq. Aalisarnermik suliffissuaqarnermi naligiissitaannginneq sineriammi inuiaqatigiit isumannaarniarnerannut unammilligassiisoq, misissuinerup erseqqissaavigaa.
Nunatsinni aalisarneq sanillersuunneqarsinnaanani inuussutissarsiutitsinni annersaavoq. Innuttaasut amerlasuut suliffeqartippai, nunattalu nammineerluni isertitaasa amerlanerpaartaannik isertitsiviusarluni. Taamaalilluni aalisarneq inuiaqatigiinni misinnartumik pissaaneqarfiit annersarivaat. Taamaammallu inuussutissarsiorfimmi taamak pingaaruteqartigisumi naligiissitaasoqannginnera ajornartorsiutaavoq.
Inoqarpoq suli aalisarnerup angutinut suliffiuneranik isumaqartunik. Naak imarsiornermi ilisimatusarnermi nutarsaanermilu arnat akuusut amerliartoraluartut suli taamak isiginnittaaseqartoqarpoq. Inuussutissarsiut inuiaqatigiinni taamak angitigitillugu, nunattalu ineriartornerani taamak pingaaruteqartigitillugu, aalisarnermik inuussutissarsiutip angutinuinnaq inuussutissarsiutaaneranik isumaqarneq ajornartorsiutaavoq. Arnanut isiginnittariaatsit eqqarsartaatsillu pitsaanngitsut taamaattut nungutittariaqarpavut. Taamaattoqarnissaanilu arlalinniit suliniartoqarnissaa pisariaqarpoq.
Sammisaq pillugu atuartartutut allagaqarpunga. Aalisarnermi suliffeqartut amerlanerpaartaasa nunaqavissuunissaannik inuiaqatigiinni ataatsimoorluta anguniagaqarpugut. Anguniagarlu taanna iluatsissappat, siunnerfeqarnerusumik tamanna sulissutigisariaqarparput. Ullumikkornit annertunerusumik iliuuseqarnissamut piumassuseqartariaqarpugut.
Atuartartutut allagaqaat uani atuaruk
Paasissutissat erseqqinnerusut pillugit naalakkersuisup allattaa Jeanette L. Petersen e-mail: jalp@nanoq.gl oqarasuuaatilluunniit normua: 265476 atorlugit saaffigiuk