AtuartigukNalunaq kuultisiorfissaq pillugu tusarniaalluni ataatsimiititsinerit
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Ulloq 29. januar aallarnerfigalugu 1. februar 2024 tikillugu Kujataani Nalunaq kuultisiorfissaq pillugu innuttaasunik ataatsimiititsinerit ingerlanneqassapput.
Innuttaasunik ataatsimiititsinermi peqataassapput Naalakkersuisunut ilaasortat, Naaja H. Nathanielsen aamma Kalistat Lund, Kommune Kujallermi borgmesteri, Stine Egede, kiisalu aatsitassarsiorfiutileqatigiiffimmit aallartitat.
Innuttaasunik ataatsimiititsinerni aatsitassarsiorfiutileqatigiiffik suliassami avatangiisinut tunngasut aammalu inuiaqatigiinnut sunniinissaq pillugit saqqummiissaaq. Tamanna suliassap avatangiisinut sunniutissaannik nalilersuineq (VVM) aamma suliassamik inuiaqatigiinni piujuaannartitsisumik ingerlatsinissamik nalilersuineq (VSB) pillugit ingerlatseqatigiiffiup nalunaarusiai aallaavigalugit pissaaq.
Innuttaasunik ataatsimiititsinerit Narsarsuarmi, Tasiusami, Alluitsup Paani, Nanortalimmi aamma Qaqortumi ingerlanneqartussatut pilersaarutigineqarput. Internetsikkut attaviit tamanna ajornartinngippassuk, tusarniaalluni ataatsimiititsinerit toqqaannartumik malinnaaffigineqarsinnaatinneqassapput (streaming), taamaalilluni link una aqqutigalugu internetsikkut ataatsimiititsinerit malinnaaffigineqarsinnaassallutik:
Ingerlatseqatigiiffiup kuultisiorfissaq aammalu ingerlatseqatigiiffiup Kujataani aatsitassarsiorluni ingerlatai allat pillugit videoliaq tamanut saqqummiuppaa. Video ingerlatseqatigiiffiup nittartagaani takuneqarsinnaavoq. Video tuluttut oqalulluni immiussaavoq, kalaallisut allagartalersugaalluni.
Innuttaasunik ataatsimiititsinerit sumiiffinni makkunani ingerlanneqassapput:
| Illoqarfik/Nunaqarfik | Sumiiffik | Piffissaq |
| Narsarsuaq | Hotel Narsarsuaq | 29. jan. 2024, kl. 19:00-21:30 |
| Tasiusaq | Atuarfik | 30. jan. 2024, kl. 11:00-14:00 |
| Alluitsup Paa | Eqaarsaartarfik | 31. jan. 2024, kl. 11:00-14:00 |
| Nanortalik | Kommunip allaffia | 31. jan. 2024, kl. 19:00-21:30 |
| Qaqortoq | Hotel Qaqortoq | 01. feb. 2024, kl. 19:00-21:30 |
Attaveqarfissat
Tusagassiortunit saaffiginninnerit: Naalakkersuisoqarfimmi pisortaaneq, Jørgen T. Hammeken-Holm, 346800
Saaffiginninnerit allat: Aatsitassanut Ikummatissanullu Aqutsisoqarfik, mlsa@nanoq.gl