Utoqqalinersialinnut, utoqqalinersianut tapit ilaannik annaasaqartunut, aaqqiissuteqartoqassaaq

2023-mi Inatsisartut ukiakkut ataatsimiinneranni pilersuisussaaqatigiinnerup atorunnaarsinneqarnerata kingorna, utoqqalinersiallit amerlasuut aningaasanik nammineq atorsinnaasaminnik amerlanerusunik pissarsipput. Ajoraluartumik inatsimmik allannguisoqarnermi siunertarineqanngitsumik kingunerisaanik utoqqalinersiallit ilaat utoqqalinersianut tapinik annikillisaavigineqarput. Naalakkersuisut isumagivaat, siunissami utoqqalinersiallit eqqugaasut siornatigutut utaqqalinersianut tapit assinganik pisartagaqaqqilissasut.

2023-mi Inatsisartut ukiakkut ataatsimiinneranni pilersuisussaaqatigiinnerup atorunnaarsinneqarluni inatsisip allanngortinneqarnerata kinguneranik utoqqalinersiaqarneq pillugu Inatsisartut inatsisaanni § 5, imm. 2 peerneqarpoq. Utoqqalinersialinnut ikitsuinnarnut allannguineq tamanna isumaqarpoq, utoqqalinersianut tapit ikilisinneqarnerannik.

2024-mi Inatsisartut upernaakkut ataatsimiinneranni oqaasertaliussaq aamma § 5, imm. 2-mik atuutilersitseqqiineq
Naalakkersuisut kissaatigaat ajornartorsiut piaarnerpaamik aaqqiivigineqassasoq. Taamaattumik Naalakkersuisut Inatsisartuni Aningaasaqarnermut Akileraartarnermullu Ataatsimiititaliamut oqaasertaliussassatut siunnersuummik saqqummiussipput. Oqaasertaliussap utoqqalinersialinnut, siornatigut § 5, imm. 2-mut ilaatinneqartunut, tapimik tunineqarsinnaanerannut kommunit tunngavilissavai. Ataatsimiititaliap oqaasertalissaq maannakkut akuersissutigaat.

Oqaasertaliussaq 1. februar 2024 aallarnerfigalugu atuutilereertussaavoq. Tamatuma kingorna utoqqalinersialinnut kisermaanut utoqqalinersianut tapeq, utoqqalinersiallit piumasaqaatinik naammassinnittunut kommunit tunniussisinnaalissapput.

Pissusiviusumik oqaasertaliussaq isumaqarpoq, 2023-mi Inatsisartut ukiakkut ataatsimiinneranni pilersuisussaaqatigiinnerup atorunnaarsinneqarnerata kingunerisaanik innuttaasut siunertarineqanngitsumik utoqqalinersianut tapit ilaannik annaasaqartut, siornatigutut pisinnaatitaaffinnik assinganik siunissami peqalissasut.

§ 5, imm. 2-mik ataavartumik atuutilersitseqqiineq
Aningaasanut inatsimmut oqaasertaliussaq taamaallaat utaqqiisaasumik aaqqiissutaavoq.

2024-mi Inatsisartut upernaakkut ataatsimiinneranni utoqqalinersiaqarneq pillugu Inatsisartut inatsisaannik allannguisoqarnissaa pillugu siunnersuummik, § 5, imm. 2-mik ataavartumik atuutilersitseqqittussamik, saqqummiussiniarlutik Naalakkersuisut pilersaaruteqarput. Inatsisissatut allannguinissamut pilersaaarutaasoq Inatsisartunit akuersissutigineqassappat, inatsimmik allannguineq piaarnerpaamik atuutilersinneqassaaq. Taamaalilluni inatsimmik allannguinerup aningaasanut inatsimmi oqaasertaliussaq atorunnaarsissavaa.

Attaveqarfissaq
Erseqqinnerusumik paasisaqarusukkuit attaveqarit naalakkersuisup allattaanut Helene S. Pedersenimut e-mailikkut: hspd@nanoq.gl imaluunniit oqarasuaatikkut + 299 34 56 11