Atuartiguk2024-mut puisip amiinut tunitsiveqarnermut tapiissutit pillugit isumaqatigiissut atsiorneqarpoq
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Naalakkersuisut, Great Greenland A/S aamma KNAPK 2024-mut puisip amiinut tunitsiveqarnermut tapiissutit pillugit isumaqatigiissuteqarput.
2024-mut tunitsiveqarnermut tapiissutit imatut agguarneqarput:
| Koruuninngorlugu ataatsimut tunitsiveqarnermut tapiissutit | |
| Natseq 70 cm-init minnerusoq | 329 |
| Natseq 70 cm-init annerusoq | 358 |
| Aataat | 478 |
| 2024-mi katillugit annerpaamik nalinginnaasumik tunitsiveqarneq | 12.970.100 kr. |
| Bonusi (ukiortaaq 2025) |
1.000.000 kr. |
Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen oqarpoq:
”Isumaqatigiissut pingaaruteqartoq pitsaasorlu maannakkut isumaqatigiissutigineqarpoq. Isumaqatigiissuteqarnissap tungaanut oqaloqatigiinnermut peqataasut qutsavigaakka. Tamanna pilersitsiviulluartumik aammalu aaqqiissutissarsinissaq ukkataralugu ingerlanneqarsimavoq. Puisit amiinik tunisisarnerup siunissaa piniartunullu atugassarititaasut tamaviaarput aammalu silap pissusaata allanngoriartornera inuussutissarsiummut sunniivoq. Taamaattumik pisariaqartitsinerit pilertartut aamma pissusiviusut atukkagut, ukiuni makkunani sukkasuumik allanngortartut, pillugit oqaloqatigiinnerup attatiinnarnissaa pingaaruteqarpoq”
KNAPK oqarpoq:
”KNAPK-imiit 2024-mut tunisinermut akigititat, tapiissutit, bonusit aammalu tunitsiveqarnermut ilitsersuutit maannakkut kiisami inissitsillugit isumaqatiginninniutigineqareermata nuannaarutigaarput. Inernera kingusinaalaartumik inissikkaluartoq neriuutigaara inuussutissarsiutigalugu piniartut tamatumunnga isumakkeerfigisinnaagaatigut, tassami akigititat qaffallugit iluarsineqarmata.
Piniarnermik inuussutissarsiorneq naluneqanngitsutut annertuumik tamaviaarfiuvoq, pingaartumik atuisartunut akigititat qaffakkiartuinnarneranni. Taamaattumik tunisinermut akigititat qaffallugit iluarsineqarnerat piniartorpassuarnut annertuumik iluaqutaasussaavoq.”
Paasissutissanik annertunerusunik piniarnermi attaveqarfigineqassaaq Naalakkersuisoqarfimmi pisortaaneq Jørgen Hammeken-Holm joeh@nanoq.gl –mut allalluni imaluunniit oqarasuaammut 346846-mut sianernermi