AtuartigukKangerlussuarmi angallatit aqqutaannik itisiliineq
Nassiussisuuvoq: Ineqarnermut Attaveqaasersuutinuullu Naalakkersuisoqarfik
Kangerlussuarmi angallatit aqqutaata itisilerneqarnissaa pillugu najukkami entreprenørip, aqqartartullu Polar Dive-p isumaqatigiissuteqarfigineqarneratigut, Kangerlussuarmi angallatit aqqutaat ukiumi nutaami angallavikkuminarnerulissaaq.
Angallatit aqqutaata qanitarisaani kuummeerlutik sioqqat ujarannguussimasut patsisaallutik, angallatit aqqutaat 800 meterinik takitigisoq, 40 meterinillu nerututigisoq ukiut tamarluinnaasa ikkalisarpoq. 2023-mi itissutsinik uuttortaanerni paasineqarpoq ujarannguussimasunik kinneqangaatsiartoq, tamannalu tininnganerani usisaatinut ikaartaatinullu unammillernartarlunilu kinguaattoortitsisarpoq. Taamaattumik umiarsualivik suli tulaffigineqarsinnaaqqullugu, angallatit aqqutaat itisilerneqartariaqarpoq. Kingullermik 2008-mi itisilingaatsiarneqarpoq.
Angallatit aqqutaat aasarisseruttornerani angallavigineqarsinnaanngorniarlugu itisiliineq aallartissinnaaqqullugu, 2024-mi pajuttaat siullermeerluni Kangerlussuarmut tikinnissaanut Polar Dive assaammik tikisitsissasoq isumaqatigiissutigineqarpoq. Angallatit aqqutaata pisariaqartumik itissusissaa, ukiorpassuillu angallavigineqarsinnaanissaa qulakkeerumallugu, itisilerneqarnera 2025 tikillugu suliarineqassaaq.
Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl