Namminersorlutik Oqartussat Air Greenland A/S-illu timmisartortartutut ilinniarneq pillugu nutaamik isumaqatigiissuteqarput

Namminersorlutik Oqartussat aamma Air Greenland A/S ulloq 21. december 2023 timmisartortartutut ilinniarneq pillugu nutaamik isumaqatigiissuteqarput.

Isumaqatigiissutip kingunerisaanik Center Air Pilot Academy Danmarkimiittoq aqqutigalugu Air Greenlandi ukiumut timmisartortartunngorniat arfinillit ilinniarnerat aqussallugu periarfissaqalissaaq, taamaasillunilu 2030-p tungaanut 36-t timmisartortartutut ilinniarnissaat aqussallugu periarfissaqassalluni. Tamatumattaaq kingunerisaanik Namminersorlutik Oqartussat timmisartortartunngorniarnermut aningaasartuutit affaasa akilerneqartarnissaasa isumagineqarnissaat ingerlateqqissavaat, aningaasartuutillu sinneri ilinniartup ilinniarnermini aningaasanik attartugassaatut inissinneqassallutik.

Namminersorlutik Oqartussanik isumaqatigiissuteqarnikkut Air Greenlandip 1981-imiilli timmisartortartunngorniarneq aqutaraa, taamaalillunilu timmisartortartut 34-t ilinniarnerat siulersorsimallugu. Naak aaqqissuussineq taamaattoq atuukkaluartoq Air Greenlandip nunanit allanit timmisartortartunik atorfeqartitsinissani pinngitsoorsinnaasimanngilaa.

”Nunatsinni attaveqaasersuutit tungaatigut iluamik inissisimanissaq qulakkeerneqassappat pisariaqarpoq Air Greenlandip suliassamisut naatsorsuutigisai naaperiarnissai. Tamanna tunngavigalugu Naalakkersuisut aalajangiipput 2030-p tungaanut timmisartortartunngornianut immikkut aningaasatigut tapiissuteqartoqartassasoq”, Naalakkersuisoq Aqqaluaq B. Egede oqarpoq.

Kalaallit timmisartortartunngorniat aningaasaliiffigineqarpata ungasinnerusoq isigalugu inuiaqatigiinnut aningaasaqarnikkut iluanaarutaassasoq Naalakkersuisut naliliipput. Kalaallit timmisartortartutut ilinniagaqarnissaannut Air Greenland suli soqutiginnimmat Naalakkersuisup Aqqaluaq B. Egedep nuannaarutigaa. Aamma Air Greenlandip timmisartortartunngorniarnerup ataqatigiissaarnissaanut piginnaasatigut sulisutigullu pisariaqartunik atortussaqarluarnera Naalakkersuisup toqqissisimanartippaa.

Siunissami ilinniartunngorniarlutik qinnuteqartunik toqqartuinermi arnat angutillu sapinngisamik naligiissillugit periarfissinneqartassapput.

Timmisartortartutut ilinniarneq pillugu isumaqatigiissut ulloq 1. januar 2024 atuutilissaaq, kiisalu 1. april 2030-p tungaanut atuutissalluni.

Qinnuteqartut piumasaqaatinik naammassinnissimasut Air Greenlandimut innersuunneqartarnerat Ilinniagaqarnersiuteqarfiup (USF) Kalaallit Illuutaasalu ingerlateqqissavaat.

Isumaqatigiissut uani takuuk

Qinnuteqaatit uunga nassiutissavat:
https://www.sullissivik.gl/Emner/Uddannelse/Uddannelser/Videregaaende-uddannelser-paa-saerlige-vilkaar

https://www.sullissivik.gl/Forms/USF_Uddannelsesstoette_saerydelser_i_udlandet_herunder_Danmark

Sukumiisumik paasisaqarusukkuit naalakkersuisup allattaa Rosa Thorsen e-mailikkut rose@nanoq.gl imaluunniit oqarasuaatikkut: +299 34 50 00 attavigiuk