Tusagassiuutit oqaluttuassanik saqqummiussisussaapput – nammineerlutik oqaluttualiortussaanatik

Allattoq Naaja H. Nathanielsen, naalakkersuisoq aatsitassanut suliassaqarfimmut akisussaasuusoq

Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisutut isumaqarpunga, aatsitassarsiorfiutileqatigiiffiup suliffeqarfiit najukkameersut atornerlussimagai pillugu aviisimi eqqunngitsumik oqaluttualiorneq, Sermitsiap naqqiivigisariaqaraluaraa. Sermitsiap oqaluttualiaq ulloq 24. november 2023 siullermeertumik saqqummiuppaa, qulequtaralugu ”Najukkami ilaqutariit suliffeqarfiutaat aatsitassarsiortitseqatigiiffimmit atornerlunneqartoq”. Oqaluttualiami ajornartorsiutaavoq taassuma ilumoortuunnginnera. Aatsitassarsiorfiutileqatigiiffimmik R500 Greenmin-inik piginnittoq isumaqatigiissuteqarani, R500 Greemin-ip najukkami immikkoortortaatut CVR-imi nalunaarsorlugu, Isortoq Reindeer Station sanasimagaa, Sermitsiap sapaatip akunnerini arlalinni aalajangiusimaannarpaa. Suliffeqarfimmik najukkameersumik atornerluineq taanna kinaassutsimik tillinnermut eqqaanartoq, Sermitsiap kingusinnerusukkut immikkut ilisimasalik oqaaseqartippaa. Tassani ajornartorsiutaavoq oqaluttualiap eqqortuunnginnera. Sermitsiamuna nammineerluni Inuussutissarsiornermut aqutsisoqarfiup CVR-imi nalunaarsuinermut immersugassaq paatsoorsimagaa.

Aatsitassarsiorfiutileqatigiiffiup R500 Greenmin-ip Isortoq Reindeer Station immikkoortortaqarfimmitut sanasimanngilaa. Suliffeqarfik immersugassami ”ingerlatseqatigiiffimmi imaluunniit suliffeqarfimmi nunanit allameersumi Kalaallit Nunaanni immikkoortortatut” allassimasoq tassaavoq R500 Greenmin nammineerluni, tassami immersugassaq tassunga tunngassuteqarmat. Isortoq Reindeer Staton sananeqarnera tassatuaavoq c/o najukkatut atorneqarnissaa. Sermitsiap paasissutissiinera malillugu aamma tamanna kisimi illuatungeriit akornanni isumaqatigiissutigineqarsimavoq. Tassalu Isortoq Reindeer Station C/o najukkamiit allaanerusoq annertunerusumillu atorneqartoq ilumuunngilaq, tamannalu Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfimmit apeqqutilliinermi uppernarsarneqarpoq. Saaffiginninneq aviisip nammineerluni aviisimi misissuinerminut ilaatillugu minnerpaamik isumagisussaagaluagaa. 

Isumaqarpunga oqaluttualiaq pisariaqanngitsumik eqqissiviilliortitsisoq aammalu inuit aamma suliffeqarfiit arlallit tulluanngitsumik kukkusumillu saqqummiullugit. Taamaattumik Sermitsiap maannakkut oqaluttualiaq internetsikkut nittartakkaminniinnaq naqqiissuteqarfigimmagu naammanngilaq, tassami internetsikkut aviisi Sermitsiap aaqqissuussisuata ataaniinngimmat. Kisianni Sermitsiap aaqqissuussisuata ilanngutassiami nutaami allerpaani pissusiviusut allaaserineranni annikitsumik naqqiinissaq taamaallaat neqeroorutigaa. Kisianni sapaatit akunnerini arlalinni oqaluttualiamik eqqunngitsumik saqqummiussisimagaanni, allaat aviisip saqqaani, aviisip naqqiissuteqarnera aamma imaqarnerutillugu saqqumisariaqaraluarpoq. Pingaartumik Sermitsiap Transparency International-imiit misissueqqissaarluni tusagassiortarnerminut, ilaatigut aatsitassarsiornermik suliaqartuni piginnittunut tunngasut pillugit, ammasuunermut nersornaasiuttakkamik tigusaqaqqammernera, eqqarsaatigalugu. Taamaattumik Sermitsiap saqqumilaartumi oqaluttualiaminik immikkut naqqiissuteqarluni saqqummiussinissaa qilanaaraara.