Juullimut pilluaqqussut: Meeqqat juulliat

Naalakkersuisut siulittaasuata juullimut ukioq manna pilluaqqussutaa saqqummerpoq. Qalipaasoq tassaavoq 38-nik ukiulik Kristian Christiansen, eqqumiitsuliortutut KETO-mik taaguuteqartoq.

- Kristiaap qalipaariaasaa immikkuullarissoq alutorisaqaara. Juullimut pilluaqqussutip qalipagartaa takuinnarneqarsinnaavoq. Qalipaatit atugai qanortoq ilissinnut aamma nukissaninnarilik, Múte Bourup Egede oqarpoq.

Qalipaasup qalipakkani “Nunaqarfiup orpia”-nik taaguuteqartippaa.

- Qalipakkami takuneqarsinnaapput marlulissat niviarsiaraq nukappiararlu, nunaqarfiup orpiata eqqaani imminnut namminneq sanaaminnik tunisut. Aappaa poortoqqanngilaq aappaalu pooqarluni, takutikkusullugu apeqqutaanngimmat tunissut poortoqqassanersoq poortoqqassannginnersorluunniit. Niviarsiaqqap naneruut tigummisaa siunissamut neriuutaavoq, Kristian Christiansen oqarpoq.

Naalakkersuisut siulittaasuata qalipakkami meeqqat qalipanneqarnerat nuannaarutigaa.

- Meeqqat juulli pigaat. Meerannguit juullimi nuannaassappata uagut inersimasut iliuuseqassaagut. Meeqqat nuannaartut isigalugit pilluarnartaqaaq, taamaattumik ilissi inersimasut kissaateqarfigaassi, juulli meeqqanut toqqissisimanartuutillugulu nuannaarfiutikkisiuk. Tamassi juullisiorluarnissassinnik kissaappassi, Múte Bourup Egede oqarpoq.

Qalipaasoq, eqqumiitsuliortoq KETO, Upernaviup eqqaani Kangersuatsiaminngaanneerpoq. Nukissiorfiit Nuummi immikkoortortaqarfiani innaallagisserisuuvoq. Taanna qalipaanermik imminut ilinniartissimavoq.

- Qalipaaneq Nuummut atuariartorlunga 2010-mi tikikkama soqutigilerpara. Pisiniarfinni qalipaaffissat qalipaatillu tingoriaannanngorakkit imminut ilinniartippunga ullumimut qalipaarujoortarlunga. Ullukinnersiorluarnissassinnik juullisiorluarnissassinnillu ukiumullu nutaamut iserluarnissassinnik kissaappassi, Kristian Christiansen oqarpoq.