Kalistat Lund COP28-mut: Maanna nunarsuarmi nunat uagut oqaloqatigilerpaatigut –oqaluuseriinnarnata – uagut pilluta oqaluinnaratik

Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund ulluni makkunani silap pissusia pillugu ataatsimeersuarnermut COP28-mut, Dubai-imi ingerlanneqartumut peqataavoq. Naalakkersuisoq Kalistat Lund Inatsisartunit piginnaatinneqarluni COP28-mut peqataajartorpoq, Kalaallit Nunaata Parisimi isumaqatigiissummut ilaalernissaa pillugu UNFCCC-mut nalunaariartorluni.

”Nunat allat sermersuatta sisujartortup aakkiartornera, sermersuup milliartornera nunallu qeriuaannartup aakkiartornera pillugu oqaluuserigaatigut oqaluttuarisaraatigullu akuttunngitsumik tusaasarparput. Parisimi isumaqatigiissummut ilaalernitsigut, aammalu COP28-mut peqataanitsigut kingunerisassat uatsinnit – nunap inuiinit, allannguutinik sukkasuunik taamaattunik misigisaqartartunit – oqaluttuarineqartalernissaat qulakkiissavarput. Uagut, tamatuma kingunerisaanik isiginnittuusut malugisimasaqartullu. Nipitta tusaaneqarnissaa, aammalu nunarsuatsinni silap pissusiata allannguutai pillugit isumaqatiginninniarnernut peqataanissarput pingaaruteqarpoq. Maanna nunarsuarmi nunat oqaloqatigisinnaalerpaatigut – uagut pilluta oqaluinnaratik. Aamma maanna tamarmik Parisimi isumaqatigiissummut ilaalersugut ilisimalerpaat”, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq nangilluni:

”Kalaallit Nunaanni silap pissusiata allannguutaasa kingunissai siunissamut ungasissumut kingunissai malugisimavagut. Qaanaami, Siorapalummi Savissivimmilu aalisartut piniartullu maannarpiaq sikunnginnera peqqutaalluni aalisarnissamut piniarnissamullu periarfissat killeqarneri malugisimavaat. Silap pissusiata allannguutaasa kingunerisaannik annaasat ajoqusikkallu najukkani innuttaasunut, kulturitsinnut ilisimariikkatsinnullu sunniuteqarput”, Naalakkersuisoq Kalistat Lund naggasiivoq

Silap pissusia pillugu ataatsimeersuarnermi Kalaallit Nunaata peqataanera soqutigineqarluarpoq
Naalakkersuisoq Kalistat Lund COP28-p ingerlanneqarnerani nunarsuarmi nunanit, nunat inuiisa suliniaqatigiiffiinit inuiaqatigiinnillu inuinnaasunit soqutigineqarluarlutik tapersersorneqarlutillu misigisimavoq. Tamanna pingaartumik nunat inuiisa nunarsuarmit tamaneersut aallartitaasa, taakkununngalu ICC International ilanngullugu, ullormoortumik ataatsimiittarnerini misigineqartarpoq. Ataatsimiittarnerni taakkunani suleqatissanik, silap pissusia pillugu isumaqatiginninniarnerni kalaallit nunallu inuiisa soqutigisaannik siuarsaasinnaasunik nassaarniarnissaq siunnerfigineqarpoq. Nunani tamalaani silap pissusia pillugu isumaqatiginninniarnerni nunat inuiisa sunniuteqaqataanissaat, aammalu ersarissumik saqqummernissaasa qulakkeerneqarnissaa pingaaruteqarluinnarpoq. Tamatuma saniatigut Naalakkersuisoq Kalistat Lunde ilaatigut Pikialasorsuaq aaqqiissutissallu pinngortitamik tunngaveqartut pillugit oqalugiarpoq, kiisalu savalimmiormiut avatangiisinut ministeriat Ingilin D. Strom ataatsimeeqatigalugu.

Najukkani innuttaasut akuutinneqassapput – aamma siunissami silap pissusia pillugu periusissiornermi
Najukkani innuttaasut, soorlu Qaanaami, Siorapalummi Savissivimmilu innuttaasut, ulluinnarni silap pissusiata allannguutaasa kingunerinik isiginnittuupput malugisaqartarlutillu. Taamaattumik Naalakkersuisut siunissami silap pissusia pillugu periusissiornermi innuttaasut tusarnaarneqarnissaannik ersarissumik anguniagaqarput. Tamanna pissutigalugu najukkani innuttaasut, inuussutissarsiortut Inatsisartunilu partiit akuutinneqarnissaat Naalakkersuisunit qulakkeerniarneqarpoq.

Attaveqarfissaq
Annertunerusumik paasisaqarusunnermi naalakkersuisup allattaa Manasse Berthelsen tlf.: 34 56 03/54 88 68-imut imaluunniit e-mail: pan@nanoq.gl aqqutigalugu attaveqarfigineqassaa