Kapisilinnut paasissutissat amerlanerusut aalisartut akissarsissutigisinnaavaat

Kapisillit Canadami kuummi St-Jean. Assiliisoq: Nick Hawkins/ASF

Aalisartut tallimat iluatsitsillutik 5.000 koruuninik eqquipput. Tamarmik immikkut kapisilinnit paasissutissanik Pinngortitaleriffimmut nassiussaqarsimapput, paasissutissanik kapisillit sumit aggersuuneri pillugit pingaarutilinnik nassiussaqarsimallutik.
Kapisilinniarnerup nalaani kapisilinnit paasissutissanik Pinngortitaleriffimmut nassiussinissaq periarfissaavoq.
Kapisillit paasissutissartaannik nassitsisut 60-it missaanniipput. Nassiunneqartut tassaapput kapisillit tattaat aamma ipiusartaat. Pinngortitaleriffimmut nassiunneqartut tamarmik unammisitsinermut peqataapput, nassiusisullu pisatik tamaasa nalunaarsuiffissamut nalunaarutigisimavaat.

Ajugaasut tassaapput:
Abel Brandt, Qeqertarsuaq
Ane Olsen, Sisimiut
Frederik Wille, Kulusuk
John Petrussen, Maniitsoq
Napaartoq Petrussen, Nuuk

Tamarmik ilisimatinneqareerput.

Unammisitsineq North Atlantic Salmon Fund (NASF) aamma Atlantic Salmon Federation (ASF) NASF, ASF; Q´s Greenland, Aalisarnermut Piniarnermullu Naalakkersuisoqarfik aamma Pinngortitaleriffik suleqatigalugit aningaasalerneqarpoq.

Kapisillit ingerlaarfiinut pingaarutilinnik paasissutisseeqataapput
Kapisilinnit paasissutissat kapisillit sumi, nunarsuup ilaanit, aggersuuneri - tukerfii ilisimasaqarlualerfiginissaannut iluaqutaassapput. Kapisillit nunatsinniittartut Amerika Avannarliup aamma Europap kuuininngaanneersuusarput nunatta imartaani nerisassarsioriartortarlutik. Ukiuni ataatsimit pingasunut imaaniittarput, imaaneereerlutik kuunnut pinngorfimminnut utertarlutik.

Kapisillit nunat tikiffigisartagaat. Asseq: ASF

Kapisillit atlantikup imartaaniittut sumiiffimmit sumiiffimmut 4.000 sømilinit isorartutiginerusoq ingerlaarfigisarpaat. Amerika Avannarlermi Europamilu kuuppassuit immikkut tamarmik asseqanngitsunik kapisileqartarput. Kapisilinnit paasissutissat misisoqqissaarlugit paasineqarsinnaasarpoq kapisillit kuuk sorleq tukerfigisimaneraat.
Kapisilinnit paasissutissatut nassiunneqarsimasut tamanut 2024-mi upernaakkut atuarneqarsinnaalissapput.

2024-mi kapisilinniarneq aallartippat kapisilinnit paasissutissanik nassitsisarneq aallarteqqinneqassaaq. Paasissutissanik nassitsisut akissarsitinneqarnissaminnut periarfissaqassapput. Eqqaamaqqunaqaaq kapisilittarineqartut nalunaarutigineqartarnissaat.

Paasissutissat amerlanerit Aalisarnermut Piniarnermullu Naalakkersuisoqarfimmut saaffiginnilluni pineqarsinnaapput: apn@nanoq.gl