Naalakkersuisup Stavangerimut tikeraarnermini attuumassutilinnik ingerlataqartut arlallit pulaarnerini isumassarsiaqarfigai

Akisussaaffinnik attuumassutilinnik ingerlataqartut assigiinngitsut pingasut soqutiginartunik saqqummiinertalinnik takornariartitsinertalimmillu tikilluaqqusipput.

Naalakkersuisup Aqqaluaq B. Egedep Stavangerimut tikeraarnermini arnat assammik arsaallutik pissartanngorniunnerisa saniatigut Aqqaluaq suliassaqarfigisami iluani akisussaaffigisaminut tunngatillugu isumassarsiornissamut piffissaqarsimavoq.

Ingerlataqartut assigiinngitsorujussuit pingasut tikilluaqqussutitut pissanganartunik saqqummiillutillu takornariartitsipput.

Siullertut Stavangerimi Barnevernstjenesten, meeqqanik sullissivik, pulaarneqarpoq. Suliffeqarfiup pissanganartumik isumassarsinartumillu saqqummiunneqarnera Stavangerip kommuniani barnevernschefimit, Jacob Bråtåmit immikkoortortamilu pisortanit marlunnit ingerlanneqarpoq meeqqanillu sumiginnarneqarsimasunik ikiuillutik sulinerminni atortakkatik periaatsitillu tigussaasumik aamma saqqummiuppaat.

Meeqqat inuusuttullu pissutsini inuunerminni atugarissaarnerannut, peqqissusaannut ineriartornerannullu ajoqusiisinnaasunik atugallit eqqortumik ikiorneqarnissaannut qulakkeerinninnissaq Barnevernstjenestenip pingaarnertut suliassaraa.

- Pulaarnissamut suliamillu ilisimasallit meeqqat inuusuttullu sapinngisamik pitsaanerpaamik sinaakkuteqarnissaannut qulakkeerinninnissamik siunnerfilimmik tunniusimasumillu allatut suliallit pillugit tusarnaarsinnaanissaannut periarfissaqarsimagama nuannaarutigeqaara. Eqqarsaaterpassuaqarlunga isumassarsiarpassuaqarlungalu angerlassaanga taakkualu aallaavigalugit suleriaqqissinnaanissaq neriuutigaara, Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede, oqarpoq.

Madlamark Skolen tulliullugu pulaarneqarpoq, tassani rektoriusoq Margrethe Hjardeng tikilluaqqusivoq. Meeqqat atuarfiat Madlamark Skolen 350-it missaanni atuartoqarpoq Stavangerillu qeqqani inissisimalluni. Atuarfimmi atuartut immikkut assigiinngitsorujussuarnillu pisariaqartitallit immikkut atuartinneqarnissamik neqeroorfigineqartarput, meeqqat timimikkut eqqarsartaatsimikkullu pisinnaasakinnerulersimasut aammattaaq neqeroorfigineqartarput.

Atuarfimmi atuartut tamarmik pitsaasumik sumiiffigisinnaasamiinnissaat pitsaasumillu sumiiffigalugu ilinniarfigisinnaasamiinnissaat atuarfimmit takorluugarineqarpoq. Atuarfimmi avatangiiseq pitsaasoq akuutitsisorlu aqqutigalugu atuartut ilinniarnerat ineriartoqqinnerallu atuarfimmi qitiutinneqarpoq. Atuarfik, takorluukkat atuarfimmilu meeqqanut sullisseriaatsit pillugit pissanganartumik saqqummiisoqareernerata kingorna atuartoq ataaseq atuarfimmi atuartut immikkut tapersersorneqarnermik pisariaqartitallit immikkoortortaqarfiannut takornariartitsivoq.

Nuna tamakkerlugu meeqqeriviit pillugit marlunnik ilisimatusarfeqarpoq, taakkunannga aappaa FILIORUM-iuvoq taannalu kingullertut pulaarneqarpoq. Ilisimatusarnerit, ilisimasat ineriartortinneqartarnerat nutaaliornerillu ilisimatusarfimmi ingerlanneqartarput immikkoortumullu meeqqeriveqarfimmut nutaaliortutut suleqatigiiffiulluni.

Atassuteqarnernut, attaveqatigiinnernut aamma meeqqat tamarmik pinnguartarnerannut pitsaasunik atugassaqartitsilernikkut, meeraaqqerivinni assigiinngiiaartuni qaffasissumik pitsaassuseqalersitsinissaq ilisimatusarfimmit sulissutigineqarpoq. Matumani ilisimatusarnerup meeqqerivinni sulianik ilisimasalinnut qanoq pissarsiassanngortinneqartarneranut suliaqartarneq tusarnaassallugu immikkut pissanganaateqarpoq.

Ulloq ataatsimut isigalugu pissarsianik paasisanillu ulikkaarpoq tamannalu eqqarsaatersuutissanik tunisivoq.



Attavissaq
Sukumiisumik paasisaqarusukkuit naalakkersuisup allattaa Lars Salik H. Kielsen e-mailikkut salik@nanoq.gl imaluunniit oqarasuaatikkut: +299 34 50 00 attavigiuk.