FN-p nunarsuaq tamakkerlugu arnanik persuttaasarneq akiorniarlugu ullorititaa

Inuussutissarsiornermut, Niuernermut, Aatsitassanut, Inatsisit atuutsinneqarnerannut Naligiissitaanermullu Naalakkersuisup Naaja H. Nathanielsenip oqaaseqaataa:

Arnanut niviarsiaqqanullu persuttaasarneq suli nunarsuarmi ajornartorsiutini siaruarsimanerpaallunilu annertunersaavoq. Taamaammat FN-p nunarsuaq tamakkerlugu arnanik persuttaasarneq akiorniarlugu ullorititaata aamma ukioq manna malunnartinnissaa pingaaruteqarpoq.

Inuiaqatigiitsinni kisitsisit uissuumminartut amerlavallaat inuttut persuttaasarnermik nalaanneqartarnerannik takutitsisut pigaavut. Persuttaasarneq ajornartorsiutaavoq kinguaariinni ingerlaaqqittartoq, tunuliaqutaasutullu pissusilersuutit isummallu persuttaasarnermik ataavartitsisut aatsaat allanngortikkutsigit, kingornuttagaq kusanaatsoq taanna unitsinneqarsinnaavoq.

Persuttaasarneq siuaassutsinut tamanut inuiaqatigiinnilu kikkunnut tamanut eqquisarpoq. Persuttaasarneq nutaamik periuseqarluni saqqummertuarpoq. Amerlanerpaasugut persuttaasarnerup timikkut persuttaasarnermit annertunerunera, assigiinngitsunillu iluseqarluni takkussinnaasoq nalunngilarput.

Piffissami teknologip immitsinnut attaveqatigeeriaatsitsinnik allanngueqataaffiani, persuttaasarneq silarsuarmut digitaliusumut annguppoq. Uumisaarinerup, qunusaarinerup pinngitsaaliinerullu persuttaasarnerup ingunngisai annertusivai, arnarpassuillu niviarsiararpassuillu qarasaasiami ulluinnarni inuuneranni sunnertarlugit. Minnerunngitsumik piffissami inuinnaat qarasaasiakkut naapittarfii inuunitsinnut ullut tamaasa akuuffigisaasa nalaanni.

Tamatta ataasiakkaarluta qarasaasiami piffimmik isumannaatsumik pilersitsinissamut akisussaaffeqartariaqarpugut, tassanilu ataqqeqatigiinneq aallaaviullunilu kikkut tamarmik isumannaatsumik isersimasinnaaffianni.

Persuttaasarnerli arajutsisimaneqarnerpaaq, tassa aningaasaqarnikkut persuttaaneq aamma eqqumaffigisariaqarparput. Aningaasaqarnikkut naligiinnginneq nipaatsumik atornerluinerusinnaavoq periarfissanik killiliisoq, persuttaasumillu pinngitsuuisinnaannginnermik attassisoq. Tamannalu aningaasaqarnikkut naligiinnermik pilersitsinissamut patsisissaavoq alla ataasiakkaanut nammineerluni toqqaasinnaanermut kiffaanngissuseqalersitsisoq.

Persuttaasarneq aporfeqanngilaq taamaammallu aatsaat naapilluni pisartuunani. Qarasaasiakkut inuunitsinnut sumulluunniillu nikittarfigisatsinnut kiisalu aningaasaqarnikkut aaqqissugaanitsinnut anngutereerpoq. Taamaammat persuttaasarneq oqaloqatigiissutigiuartariaqarparput, tikkuartorlugu, pinaveersimatillugu, akuersaarnagu, persuttaanerullu ikit pilersitaasa mamitinnissaat periarfissillugu.

Inuppassuit ullut tamaasa persuttarneqartartut eqqummaariffigineqarnissaat pillugu, Naalakkersuisut innuttaasut tamaasa ullumikkut ullormik malunnartitsinissaannik kaammattorumavaat.

Paasissutissat erseqqinnerusut pillugit naalakkersuisup allattaa Jeanette L. Petersen,
jalp@nanoq.gl, oqarasuaat 34 52 06 attavigiuk