AtuartigukIkippallaat coronamut nualluummullu akiuussusertissimapput
Nassiussisuuvoq: Peqqissutsimut Naalakkersuisoqarfik
Ukiarpugut-ukioriartulerpugut, tassanilu covid-19-imik nualluuummillu tunillaassuuttoqarnerulernissaa naatsorsuutaavoq. 65-ileereersimaguit, naartuguit 2. immaqaluunniit 3. trimesterimi imaluunniit anigorsinnaanngisamik nappaateqaruit coronamik immaqaluunniit nualluummik tunillatsinnikkut sakkortuumik atugaqarnissamut qaninneruvutit. Coronamik nuallummilluunniit tunillatsissimaguit atuuppoq, siornatigut tamakkiisumik akiuussusertissimanersutit apeqqutaanngilaq. Sooq? Virus allanngorartarmat timi imminut illersorluarsinnaaniassammat akiuussuserneqarnissamik pisariaqartitsitsivoq.
Nuna tamakkerlugu qaammatini kingullerni peqqinnissaqarfik coronamut nualluummullu akiuussusersuinissamut neqerooruteqarsimagaluartoq, ataatsimut isigalugu akiuussusertissimasut suli ikippallaarput, aamma ukiumi utoqqaat amerlanerusut napparsimavimmut unittartut ikinnerunissaat qulakkeerniarlugu naammanngilaq. 65-ileereersimasut 40%-ii taamaallaat akiuussuserneqarsimapput. Taamaattumik piffissap ilaani coronamut nualluummullu akiuussusersuinissamut neqerooruteqarneq peqqinnissaqarfiup ingerlatiinnarpaa.
”Akiuussuserneqarnissamut neqeroorfigineqartut tamarmik akiuussuserneqassasut kajumissaarusuppakka, taamaalilluta inuit coronamik nualluummilluunniit sakkortuumik atugaqarsinnaanerat pinngitsoortissinnaaniassagatsigu. Akiuussusersuineq innuttaasunut ataasiakkaanut isumannaatsuutitsilluassaaq, tamatumalu peqatigisaanik ukiuunerani peqqinnissaqarfitsinnut iluaqutaassalluni”, taama oqarpoq Peqqissutsimut Naalakkersuisoq Agathe Fontain.
Anigorsinnaanngisamik nappaateqarnerlutit nalornissutigigukku nittartakkami www.corona.nun.gl-mi paasisaqarnerusinnaavutit Nalornissuteqaruit sumiiffimmut akiuussusersuiffiusumut ornigunnissannut tikilluaqqusaavutit, tassami inuit ikippallaat akiuussusernagit amerlavallaat tunerusunneruavut.
KAPITEREERSIMANNGIKKUIT piffissaq sumiiffillu ataani allasimasut takukkit.
| Sumiiffit | Piffissaq |
| Nuuk, Dronning Ingridip Peqqissaavia | Ullut tamaasa nal. 14.00 |
| Sisimiuni qitiusumik napparsimmavik | 30. november nal. 13.00-16:00 5. december nal. 13:00-16:00 |
| Maniitsoq, angerlarsimaffimmi peqqissaasoq | Ullut tamaasa nal. 13.00-15.00 |
| Aasiaat, napparsimmavimmi nakorsiartarfik | Pingasunngornerit tamaasa nal. 13.00-15.00, pingasunngorneq 6. december ilanngullugu. |
| Qasigiannguit, peqqissaavimmi nakorsiartarfik | Pingasunngornerit tamaasa nal. 13.00-15.00, pingasunngorneq 6. december ilanngullugu. |
| Qeqertarsuaq, peqqissaavik | Pingasunngornerit tamaasa nal. 13.00-15.00. pingasunngorneq 13. december ilanngullugu. |
| Upernavik, peqqissaavik | Pingasunngornerit tamaasa nal. 13.00-15.00 |
Paasissutissat nutaanerit paasiumallugit nittartagaq alakkaruk www.corona.nun.gl. Illoqarfigisat nunaqarfigisalluunniit allattorsimaffimmi ilanngunneqarsimanngippat peqqissaavik qaninnerpaaq attavigiuk.
Paasissutissat sukumiinerusut nunatsinni nakorsaanermut Henrik L Hansenimut, HENH@nanoq.gl imaluunniit oqarasuaatikkut 553561-imut saaffiginnilluni pissarsiarineqarsinnaapput.