Kalaallit Nunaata EU-llu akornanni suleqatigiinnissamik isumaqatigiissummi nutaamik mingutsitsinngitsumik suleqatigiinneq

Ulloq 15/11-2023 Kalaallit Nunaata EU-llu akornanni “Mingutsitsinngitsumik Siuariartorneq”-mik pilersaarummik taaneqartumut atortuulersitsinissamut pilersaarut Naalakkersuisut akueraat.

Pilersaarummi “Mingutsitsinngitsumik Siuariartorneq”-mi Kalaallit Nunaata amerlanernik assigiinngitsunik isertitaqalernissaanut ikornissaa, mingutsitsinngitsumillu ikaarsaarnermik tapersiinikkut aningaasaqarnerup assigiinngiiaarnerulernissaanik ikiuinissaq siunertaavoq. Pilersaarummut tunngaviusumik sinaakkutit makkuupput:

• Immikkoortuni assigiinngitsuni suliniutit 29-it, tassani Ilisimatusarneq, Takornariartitsineq, Uumassusillit assigiinngiiaartuunerat, Nukissiuutit ataavartut Aatsitassallu ilanngullugit.
• Aningasalersuutit katillugit 168 mio. kr-t.
• Piffissaq atuutilersitsivissaq 2024-2027.
  
  

Pilersaarummi suliniutitut assersuutitut Tasersiap Tarsartuullu Tasersuani erngup nukinganik innaallagissiorfissamut periarfissap unammissutigineqarnissaanut suliniummut tapersiineq taaneqarsinnaavoq. Suliniummi Kalaallit Nunaannut nutaanik aningaasaliinissamut pilerilersitsinissamut periarfissaq ammaanneqarpoq.

Suliniummi allami Kalaallit Nunaanni immap naqqani uumassusillit sunniivigeqatigiinnerannik misissuinissaq nakkutilliinissarlu ilaapput. Suliniutip uumassusillit immap naqqaniittut paasilluarnerunissaannik ikiussavaatigut, taamaalillunilu pissutsinik aaliarnermut tunngassuteqartunik ilisimasatta nukittorsaanissaanut tamanna ilapittuisinnaavoq.

Mingutsitsinngitsumik Siuariarnermut pilersaarutip suleqatigiinnissamut isumaqatigiissummi nutaamik ineriartorneq ersersippaa. Taamaalilluni EU-mik suleqateqarnitsinni periutsimik nutaamik aallarniisuuvoq. EU-mik suleqatigiinnissamik isumaqatigiissut 2007-mili ingerlavoq, 2020-lu tikillugu taamaallaat ilinniartitaanermut immikkoortumut sammitinneqarluni. Ukiuni kingullerni suleqatigiinnissamut isumaqatigiissut immikkoortuni nutaani suleqatigiinnermut annertusineqarpoq.

Tassunga tunngatillugu Aningaasaqarnermut Akileraartarnermullu Naalakkersuisoq ima oqaaseqarpoq “Mingutsitsinngitsumik siuariartornermik isumaqatigiissut nunatta ukiuni amerlasuuni EU-mik pitsaasumik suleqateqarnerata pissusissamissoortumik ineriartorteqqinnerivaa. Manna tikillugu suleqatigiinnerput ilinniartitaanermut aallussisup maanna mingutsitsinngitsumik ikaarsaarnermik ikorfartuinermik ilallugu, maanna ukiuni arlalinni nukissiornermut tunngasuni ingerlateriikkatsinnut annertusineqarnera tikilluaqquara. Mingutsitsinngitsumut ikaarsaarneq nunatsinnut isertitassanik ineriartornissamullu nutaanik periarfissiiumaarnera qularinngilara.”

Mingutsitsinngitsumik Siuiariartornissamut pilersaarut 2023-mi ukiakkut ataatsimiinnermi 2024-mut Aningaasanut Inatsisissatut Siunnersuutip ilaatut Inatsisartuni suliarineqarpoq. Pilersaarummi suliniutit aningaasanut inatsimmi kontumi 82.30.01-mi EU-mik pilersaarummut “Mingutsitsinngitsumik Siuariartorneq” tunngasut atugassanngortinneqassapput.

Aningaasaqarnermut Akileraartarnermullu Naalakkersuisoqarfik pilersaarummi, Namminersorlutik Oqartussani naalakkersuisoqarfinnik arlalinnik akuutitsisumi ataqatigiissaarinermut akisussaasuuvoq.

Paasissutissat erseqqinnerusut pillugit Specialkonsulent, Mete Han Esen, Aningaasaqarnermut Akileraartarnermullu Naalakkersuisoqarfimmi attavigineqarsinnaavoq, toqqaannartumik normu 34 67 31, mail: mese@nanoq.gl