AtuartigukAalisartut piniartullu ullorsiornissinni pilluaritsi
Nassiussisuuvoq: Aalisarnermut Piniarnermullu Naalakkersuisoqarfik
Naalakkersuisut sinnerlugit nunatsinni aalisartut piniartullu ulluannik qamannga pisumik pilluaqquakka.
Ulloq pingaartittartorujussuuara, ullormi kalaallit qangaaniilli aalisarnikkut piniarnikkullu ileqqutoqaasa attatiinnarnissaannik ilaatigut eqqaasitsisuullunilu malunnartitsisuummat. Imaani ukiut ingerlanerinerinni ajunaarsimasut eqqaaniarlugit nigaliliamik ilisisoqaraangat qamuuna attortittartorujussuuvunga.
Ilungersorlunga aalisarnermut inatsisissap qinigaaffiup matuma naammassineqarnissaanut suleqataassaanga. Aalisarneq pillugu inatsisissamut neriuuteqaqaanga, inatsisissammi anguniarpaa aalisartut susassaqartullu tamaasa isumagissallugit.
Ilisimavara aalisartunit, aalisarnermik inuussutissarsiutilinnit aamma partiinit aalisarneq pillugu inatsisissatut siunnersuummut kissaatigineqartut ilanngunneqarmata, taakku inerititalinnik oqaloqatigiittarnikkut pisarlutik. Aalisarneq pillugu inatsisissatut siunnersuut novembarimi 2023-mi tusarniutigineqalissaaq. Aalisarnermik kattuffiit aalisarnermillu inuussutissarsiuteqartut tusarniutigineqartumut isumaat uparuaatigineqartullu tusassallugit pissanganarpoq, isumaammi inatsisissamut sunniuteqarluarsinnaapput.
Inatsisissatut siunnersuut Inatsisartut upernaakkut 2024-mi ataatsimiinnerminni saqqummiunneqassaaq.
Nunarsuarmi saarulliit kiilumut akii akikilliartuinnarmata KNAPK saarulliit kiilumut akii akisunerulerseqqullugit akerliussutsimik sapaatip akunneri marluk matuma siorna takutitsivoq.
Isumaqarpunga aalisarnermut tunngasunik kattuffiit aamma aalisakkanik tunisassiortut aalisakkat kiilumut akiinik isumaqatiginniartillutik akisussaassuseqarnerungaarlutik pisussaaffeqalertariaqartut.
Matumani ilaatigut aamma pisakka tassaapput suliffeqarfissuaq inuiaqatigiinnit pigineqartoq Royal Greenland aamma ingerlatseqatigiiffiit namminersortut allat. Isumaqarpunga KNAPK kattuffiit aamma allat isumaqatigiissuteqartoqarsinnaanngikkaangat, soorlu kiilumut qanoq akeqartitsinissamut tunngasuni, Naalakkersuisunut aaqqeeqquseqqullutik saaffiginnittassanngitsut.
Illuatungeriittut akisussaassuseqarnerusariaqarput, isumaqatigiinniarsinnaassusertillu takutissinnaasariaqarlugu. Naalakkersuisut isumaqatigiittoqarsinnaanngippat isumaqatigiissitsiniartutut inissinneqarsinnaanngillat, soorlu aamma Naalakkersuisut nunarsuarmi, soorlu aalisakkanut akit aqussinnaanagillu sunnersinnaanngikkaat.
Isumaqarpunga nunarsuarmi aalisakkanut, soorlu saarullinnut akigitinneqartut malunnaatilimmik akikilligasuarnissaannik tusarliussisoqaraangat aalisakkanik tunisassiortut kattuffiillu paaseqatigiillutik kiilumut akigitinneqartussamik, sapinngisaq naapertorlugu piaartumik, siunissami isumaqatigiissusiorsinnaasariaqartut. Isumaqarpunga siniussami tamanna aqqutaasinnaasoq, taamaalilluni uteqqiattumik pissusilersorneq anigorneqarsinnaassaaq.
Tasiilami aalisartut Royal Greenlandimut tunisisalerput, RG-lu nutaamik maannakkut tunisassiorfiliorpoq, taanna aalisartunit 2024-mi tunitsivigineqalersinnaalissalluni. Suliffeqarfissuup qanittukkut nalunaarutaa naapertorlugu Tasiilami aalisartut saarulliit tunisassiorfimmut septembarimit oktobarimi matunissaanut 96 tonsit tunisimavaat.
Tunumi aalisarnerup ineriartortinneqarnissaanut maannakkut suliniuteqartoqarpoq. Suliniutigineqartup Tunumi maannakkut aalisarnikkut ineriartorneq ikorfartussavaa tunitsivinnillu periarfissaqalersitsissalluni.
Suliniutigineqartup siunertaraa Tunup sineriaata qanittuani aalisarnerup 2030-p tungaanut inerisaanissaq siuarsarsaanissarlu, aalisarneq akilersinnaasumik inuussutissarsiutaasinnaalissalluni suliffissanillu amerlasuunik pilersitsisoqassalluni.
Nuannaarutigisorujussuuara Inatsisartut upernaaq maanna ataatsimiinnerminni piniarneq aallarniarnerlu pillugit Inatsisartut inatsisaat inaarsarlugulu naammassimmassuk. Piniarneq aallarniarnerlu pillugit inatsisip siunertaraa inatsit atuisunut paasiuminartuunissaa, ullutsinnut naleqqutuunissaa aamma atoruminartuunissaa.
Naalakkersuisut inatsimmik suliaqarnerminni siunertaralugulu qulakkeerniarpaat nunatsinni innuttaasut nunatta pissarititaasa naleqquttumik aamma piujuaannartitsisumik tunngaveqarluni maleruagaqarnissaat, aamma aningaasarsiorneq suliffissaqartitsiniarnerlu tamatumani pineqarluni.
Aalisartut piniartullu tamaasa ullorsiorluarnissaannik kissaappakka.
Inussiarnersumik inuulluaqqusillunga
Aalisarnermut Piniarnermullu Naalakkersuisoq
Kim Kielsen
Sukumiinerusumik paasisaqarusukkaanni immikkoortortaqarfimmi pisortaq Aalisarnermut Piniarnermullu Naalakkersuisoqarfimmut saaffiginnittoqarsinnaavoq, e-mail: apn@nanoq.gl