Kommunini sanaartornermut sulianik sullissisut akimortumik oqallittarfiat Qapiut, ulluni pingasuni workshoperniarlutik Sisimiuni naapissapput

Nuna tamakkerlugu sanaartornermut sulianik sullissisut ulluni pingasuni workshopissallutik, sapaatip akunnerani matumani Sisimiuni naapissapput. Kommunini sanaartornermut sulianik sullissisut oqallittarfiata Qapiup aaqqissugaanik workshopertitsineq ingerlanneqassaaq.

Ullut taakku pingasut ingerlanerini sanaartornermut sulianik sullissisut Tilioq-mit oqalugiarfigineqassapput, tassani Tilioq-p ulluinnarni suliaminut attuumassuteqartorpaaluit sulianik sullissisunut saqqummiutissammagit. Taassuma saniatigut Arctic DTU pulaarneqassaaq, tassani sanaartornermut sulianik sullissisut ulluinnarni suliarisartakkatik, unammillernarsinnaasartullu sanaartornermut sulianik sullissisut ingeniørinngornianut oqaluttuarissammatigit. Tassunga tunngatillugu sulianik sullissisut misilittakkaminnik paarlaasseqatigiinnissaminnut, ulluinnarnilu ajornartorsiutaasartunik eqqartuinissaminnut periarfissaqassapput.  

Kommunini sanaartornermut sulianik sullissisut ulluinnarni misilittakkaminnik paarlaasseqatigiittarnissaminnut, sammisanillu aalajangersimasunik unammillernarsinnaasunillu eqqartueqatigiittarnissaminnut periarfissaqarlutik suliatigut oqallittarfissaannik pilersitsinissaq siunertaalluni, Qapiut 2018-imi pilersinneqarpoq. Kommunit killeqarfii akimorlugit suliatigut, suleqatigiittullu suleqatigiinnerup siuarsarneqarneratigut, kommunini sanaartornermut oqartussaasut suliatigut nukittorsarneqarnissaat oqallittarfitsigut anguniarneqarpoq. 

Oqallittarfiup allatseqarfia Ineqarnermut Attaveqaasersuutinullu Naalakkersuisoqarfiup isumagisaraa, soorluttaaq aningaasartuutit matussusertarai. 

Ineqarnermut Attaveqaasersuutinullu Naalakkersuisoq Hans Peter Poulsen ima oqarpoq: 
”Kommunini sanaartornermut sulianik sullissisut naapillutik ilisimasaminnik avitseqatigiissinnaallutik, suliatigut oqallittarfimmik pilersitsisoqarnissaa iluatsimmat nuanneqaaq. Sanaartornermut sulianik sullissisutut suliat ilungersunarsinnaasarlutillu unammillernarsinnaasarmata, suliatigut siunersiueqateqarluni eqqartueqateqartarnissaq pingaaruteqarsinnaasarpoq. Peqataasussat workshoperluarnissaannik kissaappakka, oqallittarfiullu suliaasa malinnaaviginissaannut qilanaarlunga.”

Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl