Suli atualinngitsunut inatsit nutaaq januaarip aallaqqaataani 2024-mi atuutilissaaq

Meeqqanut suli atualinngitsunut inatsisip nutaap ulluunerani neqeroorutinut utaqqisut allattorsimaffianni tulleriiaarinissaminnut kommunit piginnaatinneqalissapput. Aamma ulluunerani paaqqinnittarfinni sulisunik angerlarsimaffimmilu paarsisartunik atorfinitsitsinermi meeqqanik pinerliisimannginnermut pineqaatissinneqarsimannginnermillu uppernarsaataannut piumasaqaatit sukannernerulissapput. 

Ullumikkut ulloq 14. novembari Meeqqanut suli atualinngitsunut perorsaanikkut inerikkiartuutaasunik ulluunerani neqeroorutit pillugit inatsit nutaaq Inatsisartunit akuerineqarpoq januaarillu aallaqqaataani 2024-mi atulersinneqassalluni. Inatsisip inatsit maanna atuuttoq taarsissavaa meeqqamullu pitsaanerpaaq kiisalu suli atualinngitsunut tunngatillugu suliniuteqarnerup aaqqissuussaanerata eqaannerulernera qulakkiissallugit. 

Ulluunerani neqeroorummi inissaqaleraangat, kommunit ataasiakkaat siunissami ulluunerani neqeroorummi inissamik utaqqisunut allattorsimaffimmi tulleriiaarinermik namminneq aalajangiisalernissaat annertuumik allannguineruvoq. Meeqqalli inuttut ajornartorsiuteqarnerat pissutigalugu immikkut iliuuseqarfigineqarnissamik pisariaqartitsisut kommuninit tamatigut sallinngortinneqartassapput.

• Utaqqisunut allattorsimaffimmut kommunit namminneq piumasaqaatiminnik aalajangersaanissaminnut inatsisip nutaap piginnaatilissavai. Taamaaliornikkut kommunit namminneq pisariaqartitatik pingaartitatillu naammassisinnaavaat. Peqatigitillugu meeqqamut ikaarsaariarnermik pitsaasumik tunngavissanillu toqqissisimanartunik qulakkeerinneqataasunik ulluunerani neqeroorummi angajoqqaat pilersuisuiusullu aammattaaq sunniuteqarsinnaanerulissapput, taama oqarpoq Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede.

Ulluunerani neqeroorummi atuisunik katersuuttarfik angajoqqaat siulersuisuinik taarserneqassaaq taannalu kommunalbestyrelsimit pilersinneqassalluni, angajoqqaanik siulersuisoqarnermi perorsaasutut sulisut, angajoqqaatut oqartussaassuseqartut pilersuisuiusullu akornanni suleqatigiinnerup patajaallisinneqarnissaa anguniarneqarpoq. Ulluunerani neqeroorummi perorsaanikkut ukiumut pilersaarusiornerni, sammisassaqartitsinerni iliuuserisassanilu angajoqqaat siulersuisui sunniuteqassapput.

Ulluunerani paaqqinnittarfinni sulisut angerlarsimaffimmilu paarsisartut pineqaatissinneqarsimannginnermik meeqqanullu pinerliisimannginnermut uppernarsaataannut kiisalu angerlarsimaffimmik paarsiffiusunut akuersinissamut piumasaqaatit inatsisip sukannernerulersissavai. Taamaasilluni meeqqanut tamanut ulluunerani neqeroorutiniittunut annertunerusumik toqqissisimalersitsillunilu isumannaallisitsissaaq.

Meeqqanut suli atualinngitsunut perorsaanikkut inerikkiartuutaasunik ulluunerani neqeroorutit pillugit inatsit nutaaq naalakkersuinikkut pingaarnertut anguniakkanut atassuteqarpoq, tamanna Naalakkersuisut naalakkersuisoqatigiinnissamik isumaqatigiissutaanni aamma Inuuneritta III - Naalakkersuisut meeqqat pitsaasumik inuuneqarnissaannut suleqatigiinnissamut periusissiaat 2020-2030-mi aamma Meeqqat pisinnaatitaaffii pillugit Naalagaaffiit Peqatigiit isumaqatigiissutaanni allassimavoq. 

Attavissaq 
Sukumiisumik paasisaqarusukkuit naalakkersuisup allattaa Lars Salik H. Kielsen e-mailikkut salik@nanoq.gl imaluunniit oqarasuaatikkut: +299 34 50 00 attavigiuk.