Nunatsinni Ilinniartitaaneq pillugu Siunnersuisoqatigiit pilersinneqarnissaat isumasioqatigiinnermi aqqutissiuunneqarpoq

Nunatsinneersut ilinniartitaanermik soqutigisaqartut 39-t peqatigalugit isumassarsiffiulluartumik 7. november 2023-mi Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik Nuummi isumasioqatigiisitsivoq. Nunatsinni Ilinniartitaaneq pillugu Siunnersuisoqatigiinnut pitsaasumik sinaakkusiinissaq siunertaralugu isumasioqatigiinneq ingerlanneqarpoq.

Ilinniakkani ilikkagassatigut qaffassaanissaq aningaasaliissutinillu sunniuteqarnerusumik atorluaanissaq siunnersuisoqatigiit sammisassaasa ilaattut innersuussutigineqarput.

Siunnersuisoqatigiinni ilaasortanngorumaartut ilinniartitaanermi immikkut ilisimasaqartuunissaat sammisaqartuunissaallu aamma nunat assigiinngitsut akornannit peqataasoqarnissaa naatsorsuutigineqarpoq. 

Nunarsuarmioqatigiit akornanni nunatsinni innuttaasut unammillersinnaassuseqarnissaat ilinniartitaanerup aaqqissugaanerani pingaarnersaassaaq. Taamaattumik siunnersuisoqatigiinngortussat Naalakkersuisunut pitsaasunik innersuussuteqartassapput:

- Nunatta ineriartornera sukkaqaaq innuttaasullu ilinniagaqarnerat siunissamut aningaasaliineruvoq, nunatsinnilu innuttaasut ilinniarluarsimasut nammineerlutik nunarsuarmioqatigiit akornanni iliuuseqarsinnaanngussasut Aqqaluaq B. Egede oqarpoq.

Ilinniartitaanermi periarfissanik aamma aaqqiissutissanik nutaanik Nunatsinni Ilinniartitaaneq Pillugu Siunnersuisoqatigiinngortussat tikkuusseqataasassapput politikkikkullu aqutsisunut kiffaanngissuseqassallutik.

Nunatsinni Ilinniartitaaneq pillugu Siunnersuisoqatigiit pilersinneqarnissaannut isumasioqatigiinneq alloriartitsivoq.

Amerlanerusunik paasissutissinneqarusukkuit naalakkersuisumut allatsi, Rosa Thorsen attavigisinnaavat: rose@nanoq.gl imaluunniit oqarasuaat nassartariaq 553303.