AtuartigukArlariinnik aningaasarsiorfeqarnissamik siunertaq Naalakkersuisut nukittorsarpaat
Nassiussisuuvoq: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik
Naalakkersuisut kissaatigaat, nunami aningaasaqarnerup ineriartortinnissaani ersarissunik sinaakkuteqarlunilu siunertaqassasoq. Tassunga atatillugu inuussutissarsiutinik ineriartortitsinissaq pingaarutilerujussuuvoq. Inuussutissarsiutinik ineriartortitsinermi inuussutissarsiutinik pioreersunik ineriartortitsisoqartarpoq, inuussutissarsiornermilu periarfissat nutaat sulissutigineqartarlutik. Nunami isertitsissutaasinnaasunut nutaanut marluullutik tunngavissiipput.
Nunami inuussutissarsiutinut politikikkut, inatsisitigullu sinaakkutit ineriartortinneqarnissaannik suliaq, naalakkersuisoqarfiit arlallit akornanni suleqatigiissutigineqarpoq. Isertuaatsuuneq annertusarumallugu kiisalu ataatsimoortumik, akimortumillu tamat isiginnissuseqarnissaq qulakkeerumallugu, inuussutissarsiornermi aningaasaqarnermut periusissiat pillugit Naalakkersuisut nassuiaasiorput. Piujuartitsinermik tunngaveqarluni aalisarneq, takornariaqarneq, nukissiuuteqarneq aamma piujuartitsinermik tunngaveqarluni allanngortitsinissat, annerusumik imminnut pilersulernissat kiisalu aatsitassarsiornerit nassuiaammi ukkatarineqarput. 2023-mut aningaasanut inatsit pillugu isumaqatigiissummut, partiit tamarmiullutik atsiugaannut nassuiaat malitseqartitsineruvoq.
Inuutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen ima oqaaseqarpoq:
”Akisussaaffiit akimortumik isigineqarnissaanni inuussutissarsiornermi aningaasaqarnermut periusissiat pillugit nassuiaat sakkussaavoq, soorluttaaq inuussutissarsiutit pillugit politikikkut suliassat Naalakkersuisut ukiuni tulliuttuni pingaarnersiugaannut tamakkiisumik takussutissiisoq. Anguniakkat anguneqarnersut malinnaavigissallugu ilutigisaanik pingaaruteqassaaq. Taamaattoq inuussutissarsiorneq uninngaannanngimmat eqqaamasariaqarpoq, taamaattumillu anguniakkat, suliassallu nutaat ataavartumik takkuttuassallutik”.
Anguniakkat 28-t Naalakkersuisut namminersorlutik inuussutissarsiuteqartunik qanimut suleqateqarlutik ukiuni tulliuttuni aallartitassaat, nassuiaammi nassuiaatigineqarput.
Attaveqarfissaq: Jørgen T. Hammeken-Holm, joeh@nanoq.gl, +299 34 68 46