Naalakkersuisut kommunillu 2024-mut ataatsimoortumik tapiissutinut isumaqatigiissut nutaaq assammiffigaat

Borgmesterit Aningaasaqarnermullu Akileraartarnermullu Naalakkersuisoq ullumi 2024-mut kommuninut ataatsimoortumik tapiissutit pillugit isumaqatigiissuteqarput. 

Isumaqatigiissutip nutaap immikkoortui 
2024-mut kommuninut ataatsimoortumik tapiissutit 1,768 milliard kr.-nik naleqarput. Ataatsimoortumik tapiissutit akinut akissarsianullu 3,47 procentinik iluarsiffigineqarput. 

Siullerpaamik ataatsimoortumik tapiissutit 2024-mit ukiumut 8,7 mio. kr.-nik qaffanneqarput. Tamanna siusinaartumik soraarnerussutisiallit aappaami isertitaasa ilanngaatigineqartarunnaarneranut atatillugu pivoq. 

Isumaqatigiissutikkuttaaq isumaginninnermut immikkoortup pitsanngorsarnissaanut ataatsimoortumik tapiissutit 8,07 mio. kr.-nik qaffanneqarput. Tamanna innuttaasunut pisortat ikiorsiissutaat pillugit tapiissutisisartunut meeqqanut tapimik atulersitsinermut atatillugu pivoq.

Pisortat ingerlatsivianni isumalluutinik atuilluarneruneq 
Isumaqatigiissummittaaq kommunit namminersorlutillu akornanni kontunut inissitsiterivinnik ataqatigiissaarilluarnerunissaq anguniarneqarpoq. Tamanna kommunini aningaasaqarnermik aqutsinermut piginnaasat ataatsimoorluni annertusiniarneranut ilungersuuteqarnerup ilaatut pivoq. Tamanna pisariillisaanikkut iluanaarutissiillunilu kommunit KommuneKreditimi taarsigassarsisinnaanermik periarfissaannik ajornannginnerulersitsissaaq. Kalaallit Nunaanni kommunit KommuneKreditillu suleqatigiinnerat 2024-p aallartinnerani aallartittussatut naatsorsuutaavoq.

Isumaqatigiissut malillugu siunissaq ungasinnerusumut immikkoortuni pilersaarusiornermik atuinerup annertusinissaa sulissutigeqqinneqassaaq. Taamattaaq kommunini inissianik aningaasalersuinernik aaqqissuussinerit, ataatsimoortumik tapiissutitigut aningaasalersorneqartut, annertuumik ersarissuutinneqarlutillu takutitsilluartuunissaata pingaarutaa isumaqatigiissutigineqarpoq.

Ungasissumut sammisumik aningaasaqarnerup piujuartitsisuunissaanik aallussineq 
2024-mut kommuninut ataatsimoortumik tapiissutinut isumaqatigiissut missingersuutinut naatsorsuutinullu inatsimmi missingersuutit inissisimaneratut taaneqartoq naapertorlugu isumaqatigiissutigineqarpoq. Inatsit ilaatigut kommunit ukiunut missingersuutaasa akisussaassuseqartumik aqunneqarnerisigut, ungasissumut sammisumik aningaasaqarnikkut patajaatsuunissap qularnaarnissaanik siunertaqarpoq. 
Aningaasaqarnermut Akileraartarnermullu Naalakkersuisup Erik Jensenip suliniut nuannaarutigaa. – Attassiinnarnissamut Ineriartortitsinissamullu pilersaarummik misissueqqissaarnitsinnit, Aningaasaqarnermullu Siunnersuisooqatigiinnit siunissaq ungasinnerusumut aningaasaqarnerup patajaatsuutinnera immineq pinavianngitsoq nalunngilarput. Akisussaassuseqartumik aqutsinissaq aalajangiusimassavarput, taamaalillunilu namminersorlutik oqartussat kommunillu siunnerfeqartumik peqataanissaat tunngavissaassalluni. Kommunini isumaqatiginninniaqataasut siunissaq ungasinnerusumut aningaasaqarnikkut patajaassutsimik anguniakkamik pingaartitsinerat nuannaarutigaara. 

2024-mut isumaqatigiissutip ataatsimoorfiunera nunattalu innuttaanut atugarissaarnerup siunissamut ataatsimoorullugu qulakkeerniarneqarneranut qujanaq 
-Angusaq kisiat tulluusimaarutiginngilara, sulialli ingerlanneqarnerani pissutsit aamma nuannaarutigaakka. Kommunit oqaloqatigiinnerni akissussaaffimmik tigusipput, tamannalu siunissami kommunit annertunermik akisussaaffeqarnerulernissaannik ilimagineqartumut neriulluarnarpoq. Ukiuni aggersuni nunatsinni innuttaasut patajaatsumik atugarissaarnissaat, kommunit ajornartorsiuteqarnerannik ilisimasaqarnitsinni siunissamut qulakkiissagutsigu, oqimaaqatigiissitsiniarneq naammanngilaq, taamatullu ataatsimut nassueruteqarnerput ukioq manna kommuninik oqaloqatiginninnitsinni ersersinneqarluartoq isumaqarpunga. Tassungalu kommunit qujassuteqarfigerusuppakka, Aningaasaqarnermut Akileraartarnermullu Naalakkersuisoq oqarpoq. 

Attavissaq: 

Niels Kristian Skou (Aningaasaqarnermut Naalakkersuisoqarfik)
Toqq/direkte 345177
nisk@nanoq.gl