Atuartiguk
Utoqqalinersiallit siusinaartumillu pensionisiallit pilersueqatigiittussaaqatigiinnerat atorunnaassasoq Inatsisartut ullumi aalajangerpaat.
- Naalakkersuisut tunngaviusumik isumaqatigiissumminni anguniagaasa ilaat ullumi piviusunngorpoq. Tamanna Naalakkersuisunut ilaasortat tamarmiulluta nuannaarutigaarput. Sulili pitsanngorsagassaqarpoq, alloriaqattaarpugulli, Múte B. Egede oqarpoq.
Ima paasillugu utoqqalinersiallip siusinaartumilluunniit pensionisiallip naatsorsuunneqarnerini aapparisaasa inooqataasaluunniit isertitaat 2024-mi januaarip aallaqqaataanit apeqqutaajunnaassapput.
Tamanna siunnersuuteqartup, Isumaginninnermut, Ilaqutariinnut, Suliffeqarnermut Nunamullu Namminermut Naalakkersuisup Jess Svanep nuannaarutigeqaa.
- Inatsisartut siunnersuutinnik ilaliillutik aalajangiinerat iluarisimaartupilussuuara. Aalajangiineq utoqqalinersiallit atugarissaarnerunissaannut aqqutissiuusseqataavoq. Taakkua atugarissaarnerunissaat inissaminiinnerusinnaanngilaq, Jess Svane oqarpoq.
Annertunerusumik passisaqarusunnermi saaffigineqarsinnaavoq Naalakkersuisumut allatsi Helene S. Pedersen, Toqqaannartoq +299 34 56 11, email hspd@nanoq.gl