Eqqaaniut - Jakob Janussen

Aliasungaarluta Jakob Janussen 81-inik ukioqarluni toqukkut qimagunnera pillugu nalunaarut tiguarput.

Jakob Janussen atorfiliuvoq tunniusimasoq aammalu inuunermini ukiorpassuarni inuiaqatigiinnik innuttaasunillu sullissisilluarsimasoq.

Jakob Janussen nunatsinni inuiaqatigiit ineriartornerannut pingaaruteqarluartuusimavoq. Namminersornerullutik Oqartussani pisortatut atorfeqarsimavoq, Kalaallit Namminersorneq pillugu Isumalioqatigiissitaanni siulittaasuusimalluni aammalu Namminersorneq pillugu Isumalioqatigiissitat allatseqarfianni pisortatut atorfeqarsimalluni.

1991 tikillugu Pisortat Isumaqatigiinniartartoqatigiivini siulittaasuusimavoq aamma 1991-imiillu 1997-imut Sulisoqarnermut pisortaqarfimmi pisortaasimavoq. Tamatuma kingorna Kanukokami pisortatut ivertinneqarpoq.

Politik pillugu oqaaseqartartutut taamaallaat ataqqisaanngilaq aammali suliassaqarfiit isumaqatigiissutigineqartut nunatsinnut utertinneqarnissaannik anguniagaqarluartuusimavoq. Politikkikkut ineriartornermi suleqataalluarnera tamatuminngalu ilisimasaqarluarnera nunatsinni ilorraap tungaanut allannguinissanut aalajangiisuusimapput.

Jakob Janussen 2017-imi Ilisimatusarfimmi ataqqinaammik doktorinngortinneqarpoq aamma arlalinnik atuakkiaqarlunilu ilanngutassiuisarsimavoq.

2014-imi Danmarkimut nuukkami toqussi tikillugu Danmarkimi najugaqarpoq.

Jakob Janussenip nuliani Estrid Janussen, qitornatik marluk ernuttatillu tallimat qimatarai.

Eqqaaneqarnera ataqqinartuuli.

Múte Bourup Egede, Naalakkersuisut Siulittaasuat