Atuartiguk
Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen, Naalakkersuisut sinnerlugit Maniitsup eqqaani Seqinnersuusami Olivininik aamma Dunit-inik aatsitassarsiorluni misissuinissamut akuersissummik tunniusseqqammerpoq.
Akuersissut ingerlatseqatigiiffimmut R500 Greenmin-imut tunniunneqarpoq. Ingerlatseqatigiiffiup aatsitassat Olivin aamma Dunit, tamarmik immikkut periaaseqarfigineqarlutik CO2-nik toqqorsivimmiititsinissamut atorneqarsinnaasut, ukkatariniarpai. CO2-nik toqqorsivimmiititsineq mingutsitsinngitsumut allanngoriartortitsinermut ikaarsaariarnermi teknologiiuvoq aammalu suliassaqarfiulluni siuariartortoq.
”Seqinnersuusap eqqaata suliaqarfigineqaqqittussanngortinneqarnera nutaarsiassaavoq nuannersoq. Inuussutissarsiortortagut ineriartoraangata, tamanna tamatigut nutaarsiassaasarpoq nuannersoq, kisianni aamma silaannarsuarmi CO2-p nunarsuarmi annikillisinnissaanut tamatuma iluaqutaasinnaanerata ilimanaateqarnera aamma nuannaarutissaavoq,” oqarpoq Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq, Naaja H. Nathanielsen.
Attaveqarfissaq: Jørgen T. Hammeken-Holm, joeh@nanoq.gl, +299 34 68 46.
