Atuartiguk
Ullumikkut ulloq Kalaallit Nunaannut oqaluttuarisaanikkut pingaaruteqarpoq. Naalagaaffinngornissamut Nunanullu allanut Naalakkersuisoq Vivian Motzfeldt maannakkut Beijingimiippoq, tassanilu Naalakkersuisut sinnerlugit Kalaallit Nunaata Sinniisoqarfia pisortatigoortumik ammarlugu.
Ammaaneq Kinap Kalaallillu Nunaata pisortatigoortumik aallartitaqarnikkut attaveqarnerannik malunnartitsineruvoq. Ammaaneq pisortatigoortumik peqataasunit amerlasuunit peqataaffigineqarpoq, tassani aallartitaqarfinnit aallartitat, Kinamiut naalakkersuisuisa sinniisaat kalaallillu aalisarnermik inuussutissarsiortut najuupput.
Pisortatigoortumik ammaanermi oqalugiarnermini Naalakkersuisup ilaatigut Kinap Kalaallillu Nunaata akornanni aallartitaqarnikkut attaviit nukittuut taavai. Kalaallit Nunaata politikikkut, aningaasaqarnikkut kulturikkullu Kinamik attaveqarnini nukittorsassallugu kissaatigaa. Tassungalu tunngatillugu Naalakkersuisoq pisortatigoortumik oqalugiarnermini ima oqarpoq, ”aalisakkat aalisakkanillu tunisassiat nunanut allanut tunisatta 90 procenteraat. Tamanna aningaasaqarnitsinnut naleqartorujussuuvoq, silalli pissusaata allanngoriartornerani aamma qajannarsisitsivoq. Tamannalu Kinami aalajangersimasumik sinniisoqarfeqalernissamik Naalakkersuisut patsisaasa pingaarnerit ilagaat, niuernikkut atassuteqarnerput attakkumavarput annertusarumallugulu, peqatigisaanillu Kinami niuerfimmut isersinnaalluarnerunissarput sulissutigiumavarput, tassanilu pisortatigoortumik aallartitaqarnikkut attaveqarneq iluaqutaasinnaavoq. Kalaallit tunisassiaat piumaneqarluarput, taakkulu allaffissornikkut nittarsaanikkullu sulissutigiuarnissaat pingaaruteqarpoq. Kalaallit Nunaata Sinniisoqarfia aqqutigalugu maaniinnerput oqartussanillu oqaloqatiginninnissamik piareersimajuarnerput malunnartipparput”.
Naalakkersuisup ammaanermi pisortatigoortumik oqalugiarnerata saniatigut Kalaallit Nunaata Bejingimi Sinniisoqarfiani pisortaq Jakob Isbosethsen, Danmarkip Kinamut aallartitaa Thomas Østrup Møller kiisalu *vice-præsident for Chinese People’s Institute for Foreign Affairs oqalugiarput.
Taamatuttaaq Royal Greenland Polar Seafoodilu nerisassanik sassaallertoralugit nunatsinnit tunisassiat raajat, qalerallit saattuallu, Kinami mamarineqarluartut piumaneqartorujussuillu sassaalliutigineqarput. Taakku saniatigut Airgreenland ”Lucky draw”-mut aningaasaliivoq, taannalu Kinami SoMe Weibokkut siaruarneqarpoq, makitaasorlu Kalaallit Nunaannut angalanermik eqquisinnaavoq.
Kalaallit Sinniisoqarfiat Savalimmiut Sinniisoqarfiat peqatigalugu qallunaat aallartitaqarfianni inissisimavoq, ammaanissamullu sulineq november 2021-mi allartinneqarpoq. Coronap tunillaassuunnera pissutigalugu sinniisoqarfimmik pisortatigoortumik ammaaneq siusinnerusukkut pisinnaasimanngilaq.
Ullumi siusinnersukkut Naalakkersuisup Kinami Niuernermik Naalakkersuisup tullersortaa Ling Ji naapippaa, naapinnermilu politikikkut attaveqarneq oqallisigineqarpoq, tassani sinniisoqarfimmik ammaaneq Naalakkersuisullu Kinami niuerfimmut annertunerusunik periarfissaqarnissamik kissaataat ilanngullugu.
Ulluni aggersuni Naalakkersuisup Qingdao-imi China Seafood EXPO takuniassavaa, tassungalu Royal Greenlandip Polar Seafoodillu sinniisai takuniaaqatigissavai.
Attaveqaat: Sinniisoqarfimmi Pisortaq Jacob Isbosethsen jsis@nanoql.gl