AtuartigukKommune Kujallermi nannunik takusassassiortitsilluni takornariartitsisarnermut akuersissut tunniunneqarpoq
Nassiussisuuvoq: Nunanut Allanut, Inuussutissarsiornermut Niuernermullu Naalakkersuisoqarfik
Naalakkersuisut nannunik takusassarsiortitsilluni takornariartitsisarnermut akuersissummik kisermaassinertalimmik nunatta kangiata kujataani ingerlatsisarnissamut akuersissummik tunniussaqarput. Akuersissut atuuppoq 1. januar 2024-imiit ukiuni 5-ini, sivitsorneqarsinnaaneranullu periarfissaqarluni.
Akuersissuteqarnermi siunertaavoq akuersissummik pigisaqartup pitsaanerusunik periarfissaqalernissaa, atugassarititaasunik aaqqissuussinissamut takusassarsiortitsilluni takornariartitsisarnermut atatillugu, aningaasalersuisinnaanermut takornariartitsisarnermik nioqqummut atatillugu, taamalu takornariartussanik amerlanerusunik soqutiginnilersitsisinnaanermut, nunatta kujataani ineriartortitsinermut aqqutissiuusseqataasussanik.
”Nuannaarutigaara nunatta kujataani najugalimmut aqqutissiuussisinnaanerput inuussutissarsiummik ingerlatamik ineriartortitsisinnaanermut. Nannunik takusassarsiortitsilluni takornariartitsisarneq neqeroorutaavoq immikkuullarissoq soqutiginartorlu, naatsorsuutigaaralu amerlasuunit sammisassaq soqutigineqarluni alapernaanneqassasoq. Naatsorsuutigaarpullu aamma nunatta kujataata takornariartarfiuneranik tamanna suli annerusumik soqutiginnilersitsiumaartoq.” – taamatut oqaaaseqarpoq Naaja H. Nathanielsen.
Allat kissaateqarunik akiliuteqartitsilluni nannunik takusassarsiortitsisarnermik takornariartitsinertut ingerlatsisalernissamik, taava tamanna pisinnaavoq akuersissummik qinnuteqareernikkut. Akuersissummik qinnuteqartoqarsinnaavoq Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfimmut. Akuersissummik tunineqarsinnaanermi aallaaviusut ilagaat qinnuteqartup Kalaallit Nunaanni aalajangersimasumik najugaqartuunera.
Annertunerusunik paasisaqarumagaanni: Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfimmut saaffiginnittoqarsinnaavoq. Email: isiin@nanoq.gl, telefon +299 34 50 00.