Kalaallit poortuutinik utertitseriaasissaanni nutaami poortuutit pinngortitamut pisartut ikinnerulernerinik qulakkeeriffiussaaq

Qaammat kingulleq poortuutinut nalunaarut nutaaq tamanut ammasumik saqqummiunneqarpoq, maannalu poortuutinik utertitseriaasissamut sinaakkusiussassat aamma inissinneqarput. 1. januaari 2024 aallarnerfigalugu immiaaqqanik sodavandinillu, assigiinngitsorpassuarnik puulinnik pisisoqarsinnaalissaaq. Poortuutit taamaattut pinngortitamut pinnginnissaat qulakkeerniarlugu, Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfiup ESANI A/S niuertarfiillu suleqatigalugit poortuutinik utertitseriaatsimik nutaamik suliaqarput. Niuertarfiit soqutiginnittullu allat ataasinngornermi 9. oktobari 2023-mi ataatsimeeqatigineqarput, tassanilu utertiteriaatsimut sinaakkusiussat inaarutaasut saqqummiunneqarlutik.

”Poortuutinik utertitseriaasissap nutaap suliarineqarnerani niuertarfiit aamma ESANI A/S-ip qanittumik suleqatigineqarnissaat pisariaqarsimavoq. Maanna poortuutinik utertitseriaasissamut nutaamut sinaakkutissat aalajangiiffigineqareerput, kisiannili pisariaqartitsisoqartoq paasineqarpat suli naleqqussaanissamut periarfissaqartitsisoqassaaq. Qanittumik suleqatigiinnitta ingerlaqqinnissaanut qilanaarpunga. Niuertarfiit tassaapput ulluinnarni atuisunut attaveqartuusut, taamaattumillu aamma taakkuupput poortuutinik utertitseriaatsimi taamaattumi suut unammilligassaanerinik immikkut ilisimasaqartuusut.” Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Poortuutinik utertitseriaatsimi nutaami poortuutit, maanna utertitseriaatsimi ilisimasatsinnit amerlanerungaatsiartut ilaalertussaapput. Taamaattumik innuttaasut allannguinissat pillugit paasititsiniaanerpassuarnik naammattuugaqartarnissaat naatsorsuutigineqarpoq. Utertitsinermut akiusoq poortuutinut tamanut 2 kooruuniuinnassaaq. Taamatut aalajangiinermut maanna utertitseriaatsimi utertinneqartartut procentinngorlugit qaffasinneri tunngavigalugit naliliineq tunngavigineqarput. Aamma sumiiffinni amerlasuuni poortuutinik utertitsisarfiit, innuttaasunit ullumikkut ilisimaneqartunut assingussapput, kisiannili nutaaliaanerulaartutut isikkoqarnissaat naatsorsuutigineqarpoq.

”Nuna tamakkerlugu utertitseriaasiussaaq nutaaq, tamatta atussallugu sungiutassaraarput. Sumiiffiit siornatigut poortuutinik utertitsiaatsimut ilaatinneqanngitsut – taakkununngalu Tunu aamma Qaanaaq ilanngullugit – ilanngutsissavagut. Ajornartorsiortoqannginnissaa neriorsuutigisinnaanngilara, kisiannili piffissap ingerlanerani aaqqiissutissanik ujartuisarnissamut piumassuseqarnerput neriorsuutigissavara, neriuppungalu poortuutinik utertitseriaatsimi nutaami aaqqiissutissanik ujartuinitsinni innuttaasunit niuertarfinnillu ikiorneqarumaarluta.” Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq.

Annertunerusumik paasisaqarusunnermi attaveqarfissaq: Naalakkersuisup allattaa Manasse Berthelsen, tlf. 548868-imut imaluunniit e-mail: mabr@nanoq.gl aqqutigalugu.