Innarluutillit sapaatip akunnerat: Aporfiiaaneq aamma iliuuseqarsinnaanerulerneq

Sapaatip akunnera 41-mi innarluutillit sapaatip akunnerat aallartissaaq, ukioq manna qitiutillugu sammineqartussaq tassaavoq "Aporfiiaaneq aamma iliuuseqarsinnaanerulerneq". Peqatigiilluta inunnut innarluutilinnut periarfissanik amerlanernik pilersitsinissaq qitiutipparput, kikkullu tamaasa sapaatillu akunnerani immikkuullarissumi aaqqissuussinernut peqataanissaat kaammattuutigalutigu.

Sapaatip akunnera 41-mi uagut inuiaqatigiittut qanoq ililluta inuit innarluutillit pillugit suleqatigiinnikkut aporfiiaasinnaanitta aamma iliuuseqarsinnaanitta nukittorsernissaa nalliuttorsiutigalugulu eqqarsaatersuutiginissaanut piffissanngussaaq.

Innarluutillit ukiumoortumik sapaatip akunnerat misilittakkanik, isumassarsianik aamma oqaluttuanik avitseqatigiinnissamut periarfissiivoq, tassani qanoq iliorluta ataatsimut nunarsuaq tamanut peqataatitsiffiunerulersinnaanissaannut aamma ornikkuminarnerulersinnaanissaanut pilersitseqatigiissuugut.

Kikkut tamaasa innarluutillit sapaatip akunnerannut atatillugu aaqqissuussarpassuarnut pisussanut peqataasarnissaannik kaammattorusuppavut. aaqqissuussat tassaasinnaapput workshoppertitsinerit, kulturikkut pikialaartitsinerit imaluunniit inunnik katerititsinerit immitsinnut ilinniarnissatsinnut isumassarsiorfiginissatsinnullu periarfissiisut.

Peqatigiilluta inuit innarluutillit pillugit silarsuaq aporfiiaaviusoq iliuuseqarsinnaassutsimmik nukittorsaaviusoq pilersissinnaavarput.

Aaqqissuussat sumiifferni eqqumaffigikkit:

• Kommuni Qeqertalik
  • Kangaatsiaq
  • Aasiaat
  • Qasigiannguit
  • Qeqertarsuaq

• Qeqqata Kommunia:
  • Maniitsoq
  • Sisimiut

• Avannaata Kommunia:
  • Ilulissat
  • Uummannaq
  • Qaanaaq

• Kommuni Kujalleq
  • Narsaq
  • Qaqortoq
  • Nanortalik

Aamma illit innarluutilittut inuuninniit aporfiiaanermi aamma iliuuseqarsinnaanerulernermi inuttut misilittakkatit pillugit tusarfigerusuppatsigit.

Oqaluttuassarnik aamma isumassarsiarnik Isumaginninnermik Aqutsisoqarfimmut ugguuna avitseqatigitigut: iass@nanoq.gl, taamaalilluta peqatigiilluta siunisaq peqataatitsinerusoq ornissinnaaniassagatsigu.

Sukumiisumik paasisaqarusukkuit naalakkersuisup allattaa Lars Salik Kielsen e-mailikkut salik@nanoq.gl imaluunniit oqarasuaatikkut: +299 34 53 17 attavigiuk.