AtuartigukTimmissat napparsimasut toqungasullu
Nassiussisuuvoq: Aalisarnermut Piniarnermullu Naalakkersuisoqarfik
Kalaallit Nunaata kitaata aamma Tunup sineriaani arlalinni timmissat napparsimasut toqusimasullu pillugit innuttaasut piffissami kingullermi nalunaaruteqartarput. Pisuni amerlanerpaani naajat pineqarput.
Kalaallit Nunaanni Uumasunut Nakorsaqarfik Inuussutissalerinermullu Oqartussaaffik, Pinngortitaleriffik aaamma Danmarkimi Inuussutissalerinermik Aqutsisoqarfik suleqatigalugit timmissanik napparsimasorisanik katersineq misissuinerlu aallartinneqarsimapput.
Siornatigut Kalaallit Nunaanni timmissat nualluutaat sakkortuumik tuniluuttartoq napparsimatitsisartorlu (Aviær influenza) uppernarsarneqarsimavoq, aammalu maanna pasitsaassimaneqarpoq timmissat akornanni timmissanut nualluut napparsimalersitsisimasoq toqussutigineqarsimasorlu. Kisianni tamanna maannakkut uppernarsarneqarsimanngilaq.
Inuit timmissat nualluutaannik tunillatsissimasunit timmissanit tunillatsissinnaapput, naak tamanna aarlerinaateqarpallaanngikkaluartoq. Taamatuttaaq inuit virusimik taamaattumik tunillanneqarsimasut napparsimarujussualertarnerat qaqutigoortuuvoq. Timmissat nualluutaat nalinginnaasumik qaqutiguinnaq inunnut tuniluuttarpoq, taamaattoqartillugulu tunillatsittoq timmissat imaluunniit timmiaatit qanillisimasarlugit.
Kalaallit Nunaanni Uumasunut Nakorsaqarfik Inuussutissalerinermullu Oqartussaaffimmit kaammattuutigineqassaq timmissanik passusinerit pillugu imminut illersornissamut malitassat ataani allassimasut malinneqassasut:
- Qaqorsaaserlutit errortorit, pingaartumik erlaveersereerninni.
- Timmissat erisarnagit amiikkit (pujoralatserinnginneruvoq).
Neqit manniillu nualluummik virusitaqarunik ooqqissunngorlugit siallugit/qalallugit toqunneqartarput.
Timmissat toquinnarsimasut oqartussanik isumaqatigiissuteqareernikkut taamaallaat passunneqartariaqarput.
Asimi timmissanik toqungasunik nassaaraanni Uumasunut Nakorsaqarnermut Inuussutissalerinermullu Oqartussanut uumasut@nanoq.gl-imut imaluunniit 34 50 00-imut ammasarfiup iluani, tassa ataasinngorneq, marlunngorneq, sisamanngorneq tallimanngornerlu nal. 9.00-miit 15.00-ip tungaanut saaffiginnittoqarsinnaavoq.