Tuttunniarnissamut umimmanniarnissamullu akuersissutit digitaliusut nutaat

Aalisarnermut Piniarnermullu Naalakkersuisoqarfik (APN) tuttunniarnissamut umimmanniarnissamullu akuersissutinik suliaqarnermut tunngatillugu qarasaasiakkut aaqqissuussamik nutaamik pilersitsivoq. Qarasaasiakkut aaqqissuussaq nutaaq, Aalipi - piniarnermut allagartaq, aallarniutigalugu taamaallaat kommuninit atorneqassaaq. Qarasaasiakkut aaqqissuussatigut tuttunniarnissamut umimmanniarnissamullu akuersissutinik tunniussisarneq pisariillisarneqarpoq ajornannginnerulerlunilu. Akuersissutit nutaat pisoqqanut assingupput, digitalinnguinnarlutik.

Siornatigut tuttunniarnissamut umimmanniarnissamullu akuersissutinik tunniussineq Innuttaasunik Sullissivinni sulisunit piffissamik annertuumik atuiffigineqarluni isumagineqartarpoq. Qinnuteqartup najugaqartussaatitaaneranik aammalu piniarnermut allagartamut akiliisimaneranik misissueqqissaarnerit kingornalu akuersissuteqarnermut uppernarsaatit inummit immersorneqarnissaat ilaatigut pisariaqartarput. Digitalikkut akuersissutinik aaqqissuussarput nutaaq pissutigalugu tamanna allanngungaatsiarpoq.

Suna nutaajua?

Akuersissutinut katersivik (LULI) aammalu qarasaasiakkut aaqqissuussaq (Aalipi) atorlugit kommunit maanna toortaalaariarlutik ingerlatiinnaq tuttunniarnissamut umimmanniarnissamullu akuersissummik pilersitsisinnaapput. Suliap ingerlarnga tamaat nammineq ingerlasussanngortillugu aaqqissugaavoq, tamannalu Innuttaasunik Sullissivimmi sulisunut piffissamik isumalluutinillu annertuumik sipaarutaassalluni.

Aaqqissuussap nutaap pitsaaqutai:

1. Naammassisaqarsinnaassuseq: Siornatigut akuersissummik tunniussineq sivisungaatsiartumik suliarineqartarpoq. Maannakkut Innuttaasunik Sullissivimmi sulisut suliaq tamaat piffissap sivikitsup iluani naammassisinnaavaat, piffissaq suliarinniffiusoq annertuumik annikillillugu.
2. Kukkussutit ikilineri: Aaqqissuussap nammineq ingerlasussap assersuutigalugu najugaqartussaatitaanermik piumasaqaat eqqortinneqarnersoq aammalu piniarnermut allagartamut akiliisarsimaneq eqqoqqissaartumik misissupallassinnaavaa, tamannalu kukkusoqaratarsinnaaneranut annikillisitsissalluni.
3. Atoruminassuseq: Aaqqissuussap atoruminarnera pissutigalugu Innuttaasunik Sullissivimmi sulisut toortaalaariarlutik ajornanngitsumik akuersissummik tunniussisinnaapput.
4. Aqutsineq nukittorsarneqarpoq: Akuersissutit pillugit katersivik nutaaq tuttunik umimmannillu aqutsinermik nukittorsaavoq. Akuersissutit tunniunneqarsimasut pillugit aammalu aqutsiveqarfinnit qinnuteqartut pillugit APN sukkasuumik aaqqissuussamillu paasisaqarsinnaanngorpoq, tamannalu suliassaqarfimmi aqutsinermik malunnartumik pitsanngoriaataavoq.

Piffissamik isumalluutinillu sipaarneq

Naatsorsukannerparput, Innuttaasunik Sullissivimmi sulisut akuersissuteqarnissamut qinnuteqaammut ataatsimut 6-10 minutsinik atuinikinnerussasut. Qanittukkut kisitsisoqarmat paasivarput, akuersissutit 6.000-it missaat tunniunneqarsimasut. Tassa imaappoq, Innuttaasunik Sullissivinni sulisuvut maanna suliassanut allanut akunnerpassuarnik isumaginninnissamut piffissaqalerput.
Taamatut digitalimik nikeriartoqarnera aqutsinermik pitsanngorsaanitsinnut digitalinngorsaanitsinnullu alloriarneruvoq pingaarutilik, innuttaasunut oqartussaasunullu nuannaarutissaqqissoq. Neriuutigaarput, inuiaqatigiinnut iluaqutaassasoq aammalu aqutsinermik sunniuteqarluarnerusumut piujuartitsisumillu tunngavilimmik suliaqartumut kinguneqassasoq.

Ingerlariaqqinnissaq: Sullissivik.gl-imi imminut sullissinnaaneq

Suliniummi alloriarneq tulliusoq tassaassaaq aaqqissuussamik nutaamik Sullissivik.gl aqqutigalugu imminut sullissinnaalernissaq. Taamatut aaqqiissuteqarneq pingaarnertut innuttaasunut pitsaaquteqassaaq, tassa innuttaasut tuttunniarnissamut umimmanniarnissamullu internetikkut qinnuteqarsinnaallutillu akuersissutitik takusinnaalissagamikkit. 2024-p aasaanerani tamanna aallartinneqassasoq naatsorsuutigineqarpoq.

Akuersissutinik suliaqarneq Sullissivik.gl-ikkut ingerlalerpat tuttunut umimmannullu pisanik nalunaaruteqarluni immersugassat digitalinngorsarneqarumaarput. Taamaammat siunissami pisanik nalunaaruteqarluni immersugassat Sullissivik.gl aqqutigalugu aamma nalunaarutigineqarsinnaalissapput. Digitalinngorsaaneq inuiaqatigiinnut tamanut iluaqutaasussaq anguniagaraarput.

Paasissutissanik sukumiinerusunik piniaruit inussiarnersumik qinnuigissavatsigit uunga saaffiginneqqullutit: Immikkoortortaqarfimmi pisortaq Amalie A. Jessen, amalie@nanoq.gl, oqa. 345304