AtuartigukMaskinmesterinut tunngatillugu isumaqatigiissutissami akissarsiat erninermilu sulinngiffeqartarnermi atugassarititat pitsanngoriartussanngorput
Nassiussisuuvoq: Aningaasaqarnermut Naligiissitaanermullu Naalakkersuisoqarfik
Maskinmesterit kommunini Namminersorlutillu Oqartussani atorfeqartut 30-t missaanniittut nutaamik isumaqatigiissutissaat ukiuni tullerni sisamani atuuttussap imarisassai Maskinmesterit Peqatigiiffiata (MMF) aammalu Aningaasaqarnermut Sulisoqarnermullu Aqutsisoqarfiup akornanni isumaqatigiissutigineqarpoq.
Isumaqatigiissummi nutaami sulisussarsiortarnerit sulisullu tigummiinnarsinnaanerinut tunngasut, ilaatigut tunngaviusumik akissarsiat, tapit sulinngiffeqarnermilu angalanissanut tapiissutaasartut qaffannerisigut pisussat immikkut isiginiarneqarput. Akissarsiat pisissutaasinnaasut pitsanngortinnerisa saniatigut maskinmesterit erninermut atatillugu akissarsiaqaannarlutik sulinngiffeqartarnissaat illuatungeriinnit pingaartinneqarsimavoq.
Isumaqatigiissutip imarisaasa saniatigut maskinmesterit pisortani atorfeqartut pillugit isumaqatigiissutit pisariillisarneqarnissaannik Isumaqatigiissutit pillugit ataatsimiititaliarsuup kaammattuutigisimasaa isumaqatiginninniarnerit nalaanni naammassiniarneqarsimapput. Pisariillisaanikkut allaffissornerit assigiinnerusumik pitsaanerusumillu ingerlasinnaalernissaat anguniagaasimavoq tamatumalu saniatigut isumaqatigiissutit susassaqartunit tamanit paasiuminarnerullutillu atoruminarnerulernissaat sulissutigineqarsimalluni.
Akissarsianut pitsanngoriaatissat atuutsilersinneqartinnagit MMF-imit Naalakkersuisunillu akuerineqaqqaartussaassapput.
Erseqqinnerusumik paasisaqarusuttut Sulisoqarnermut Isumaqatiginninniartarnernullu pisortaq Frederik Schmidt, Aningaasaqarnermut Sulisoqarnermullu Aqutsisoqarfik fsch@nanoq.gl aqqutigalugu attavigisinnaavaat.
Isumaqatigiissutit pillugit ataatsimiititaliarsuup isumaliutissiissutaanut tunngatillugu annertunerusumik paasisaqarusuttut isumaliutissiisut uani atuarsinnaavaat.