2023-mi ukiakkut Covid-19-imut nualluummullu akiuussusersuineq

Ukiarpugut-ukioriartulerpugut, tassanilu covid-19-imik nualluummillu tunillaassuuttoqarnerulernissaa naatsorsuutigaarput. Covid-19-imut nualluummullu akiuussusersuinikkut perulunnissaq ilimanaateqannginnerulersarpoq. Taamaattumik inuit 65-iliisimasut utoqqaanerusullu kiisalu inuit perulunnissamut aarlerinaatillit covid-19-imut nualluummullu akiuussuserneqarnissaat Nunatsinni Nakorsaaneqarfiup innersuussutigaa.

Covid-19 aamma nualluut inuit amerlanerit sakkukitsumik atussavaat, taamaattorli ilaannut perulunnarsinnaavoq aamma unitsinneqartariaqalernermik kinguneqarsinnaavoq, ajornerpaamillu pisoqassappat inuunermik navianartorsiortitsisinnaalluni.

Kikkut covid-19-imut nualluummullu akiuussuserneqarnissaminnut neqeroorfigineqassappat?

• Inuit 65-inik ukiullit tamarmik utoqqaanerusullu
• Inuit 65-it inorlugit ukiullit napparsimallutik perululersinnaanerusut (ataaniittut takukkit)
• Naartunerup immikkoortuata aappaani aamma pingajuanni naartusut

Akiuussuserneqarnissamut neqeroorfigineqarsinnaajumalluni kingusinnerpaamik 15. januar 2024-mi 65-ileereersimassaaq, tassa imaappoq neqeroorfigineqartussat 15.januar 1959 siusinnerusukkulluunniit inunngorsimassapput.

Inuit 65-it inorlugit ukiullit napparsimallutik perululersinnaanerusut ukuupput:

Anigorsinnaanngisamik nappaatillit

• Inuit anigorsinnaanngisamik puamikkut nappaatillit
• Inuit uummalluttut aamma uummatip taqarsuisigut nappaatillit (tamatumani mattusimatinneqartut, aamma aap naqitsinerata qaffasinneranut nalimmassarneqarluarsimasut pinnagit)
• Inuit 1-imik 2-milluunniit diabetesertut (sukkortut)
• Inuit inunnguuseralugu timimi akiuussutissakitsut imaluunniit timimi akiuussutissakitsunngorsimasut
• Inuit nukillunneq pissutigalugu anersaartuutikkut akornuteqartut
• Inuit anigorsinnaanngisamik tingummigut tartumigullu napparsimasut
• Inuit anigorsinnaanngisanik allanik nappaatillit, nuallunnermik imaluunniit covid-19-imik napparsimanerup kingunerisaanik peqqissutsiminnik ulorianartorsiulersinnaasut.

Nappaatit pissutsillu allat

• Inuit 35 qaangerlugit BMI-qarlutik oqimaappallaartut
• Inuit allanik perulunnartunik nappaatillit, nuallunnermik imaluunniit covid-19-imik napparsimanerup kingunerisaanik peqqissutsiminnik ulorianartorsiulersinnaasut
• Inuit inunnguutiminnik timip akiuussinnaassusaagut sanngiiffillit imaluunniit kingorna timip akiuussinnaassusaagut sanngiillisut, imaluunniit meeqqat, nakorsap naliliinera naapertorlugu, influenzamik imaluunniit covid-19-imik peruluuteqarsinnaasunut inoqutaasut.

Immikkut aarlerinartorsiortut akiuussuserneqarnissaannut peqqinnissaqarfimmiit aggersaasoqarnavianngilaq. Innuttaasut ataasiakkaat neqeroorummi pineqartut namminneerlutik najukkami piffissami akiuussusersuisoqarnissaanik neqeroorfiusumut saaffiginnissapput. Sullinneqartussanut ilaassanerluni nalornissutigigaanni napparsimmavik peqqissaavilluunniit qaninnerpaaq aperineqassaaq.

Akiuussusersuinerit suut neqeroorutigineqarumaarpat?

• Covid-19: Covis-19-imut mRNA-mut virusip allannguutigisimasaanut nutartikkamut, Comirnaty® Omikron XBB 1.5 (BioNTech/ Pfizer)-imik taaneqartumut akiuussusersuinissaq neqeroorutigineqarumaarpoq.
• Nualluut: Nualluutinut 2023/24-mi ukiakkut ukiukkullu saqquminerpaasussatut naatsorsuutigineqartunut akiuussusersuinissamut neqerooruteqartoqarumaarpoq.

Sumi aamma qaqugu akiuussusersuisoqassava?

Sapinngisamik piaarnerpaamik 1. oktobari 2023-p kingorna akiuussusersuisoqarumaarpoq. Sumiiffiit ilaanni atuarfinni katersortarfinnilu annertunerusumik akiuussusersuinissamut neqerooruteqartoqarumaarpoq. Sumiiffinni allani napparsimavinni aamma peqqissaavinni kiisalu nunaqarfimmut tikeraarnermi akiuussusersuisoqarumaarpoq.

Illoqarfinni nunaqarfinnilu ataasiakkaani pilersaaruteqalerniariartoq najukkami allagarsiisoqarumaarpoq allatigullu attaveqaqateqartoqarumaarluni.

Paasissutissat sukumiinerusut nunatsinni nakorsaanermut Henrik L Hansenimut, HENH@nanoq.gl -ikkut imaluunniit oqarasuaatikkut 553561-imut saaffiginnilluni pissarsiarineqarsinnaapput.