Uranimut inatsit aamma Kuannersuit pillugit Kalaallit Nunaata kujataani innuttaasunik ataatsimiititsinerit

Aningaasaqarnermut, Naligiissitaanermut, Aatsitassanut Inatsisillu Atuutsinneqarnerannut Naalakkersuisoq, Naaja H. Nathanielsen, Kalaallit Nunaata kujataani innuttaasunik ataatsimiititsivoq. Qulequtarineqarput uranimut inatsit aamma Kuannersuarni aatsitassarsiorfissaq.

Innuttaasunik ataatsimiititsinerni uranimut inatsimmi paragraffit pingaarnersai aammalu inatsisip sunniutissai, sammineqarput. Inatsisip pilerneraniilli inatsisip malitsigisaanik pisinnaatitsissutinik utertitseqqusisoqarsimanngilaq, taamaattoq aatsitassarsiorluni misissuinissamut pisinnaatitsissutit ataasiakkaat inatsimmit sunnerneqarput. Pisinnaatitsissutini taakkunani eqqartorneqarnerpaajuvoq Kuannersuarni suliassaq. Taamaattumik Kuannersuarni suliassaq ataatsimiititsinerni sammineqarpoq, sooq Greenland Minerals A/S-imut piiaanissamut akuersissut pillugu marlunnik itigartitsisoqarsimanersoq nassuiarneqarluni. Aamma isumaqatigiissitsiniarnermut suliassap ingerlasup killiffia sammineqarpoq.

”Uranimut inatsit aammalu Kuannersuarni suliassamut tunngatillugu isumaqatigiinngissuteqarneq pillugit ammasuunissaq uannut pingaaruteqarpoq. innuttaasunik ataatsimiititsinerni apeqquteqarluartorpassuaqarpoq, aammalu malunnarpoq nunap immikkoortuani ineriartortitsinissaq pillugu najukkani pimoorussineq annertoorujussuusoq”, oqarpoq Aningaasaqarnermut, Naligiissitaanermut, Aatsitassanut Inatsisillu Atuutsinneqarnerannut Naalakkersuisoq, Naaja H. Nathanielsen, ataatsimiititsinerit pillugit.

Silamik pissuteqartumik angalanissamut pilersaarutaaqqaartoq ajoraluartumik allanngortinneqarpoq, aammalu ataatsimiititsinerit tulleriinneri imatut isikkoqarput:

Qaqortoq 13. september

Nanortalik 15. september

Narsaq 16. september

Narsarsuaq 17. september

Narsami innuttaasunik ataatsimiititsineq filmiliarineqarpoq, aammalu sapinngisamik sukkanerpaamik pissarsiarineqarsinnaasunngortinneqassalluni.

Attaveqarfissaq: Jørgen T. Hammeken-Holm, joeh@nanoq.gl, +299 34 68 46