Imaani isumannaallisaanerup pitsaanerulernissaa pillugu Erik Jensen aamma Lars Aagaard suliniuteqartut

Ataasinngornermi septembarip sisamaani 2023-mi, Ineqarnermut Attaveqaasersuutinullu Naalakkersuisup Erik Jensenip Klima-, Energi- og Forsyningsministeri, Lars Aagaard pingaarutilimmik ataatsimeeqatigaa. Imarsiornermi aalajangiisuulluinnartut marluk eqqartornissaat ataatsimiinnerup siunertaraa: VHF-radiop attavii, immallu assingaliornissaq.

Erik Jensen ima oqaaseqarpoq, "Imaani isumannaallisaaneq pillugu suleqatigiilluarnissaq aalajangiisuuvoq. Immap assinga aalajangiisuulluni, imaani isumannaallisaanerup siuarsarneqarnissaa eqeersimaartumik sulissutigineqassaaq. Kalaallit Nunaannut iluaqutaasussamik kinguneqartussamik oqaloqatigiinnerput nuannaarutigaara.”

Imarsiortilluni ajornartorsiulernermi kalerrisaarinermut pingaaruteqarluinnarluni VHF-radiop attaviisigut unammillernartut, aaqqiissutaasinnaasullu Erik Jensenip Lars Aagaardillu ataatsimiinnermi eqqartorpaat. VHF-radiop attavii pitsaanerulersikkumallugit nassitsissutinik amerlanerusunik nappaasoqarnissaa eqqartorneqarpoq.

Taassuma saniatigut immap assingaliornissaq ataatsimiinnermi eqqartorneqarpoq. Immap assingaliornissaq imaani isumannaallisaanermut aalajangiisuuvoq, assersuutigalugumi immap assingata ikkarlinnissaq pinngitsoortittarmagu. Sinerissap qanittuani, immamilu uuttortarneqanngitsorpassuit imaani isumannaallisaanermut unammillernartitsipput, tamassumalu pitsanngorsarneqarnissaa illuatungeriit kissaatigalugu. Nunami immap assingaliortarnerup annertusineqarnissaa siunertaralugu aningaasaliinerunissamut periarfissaasut Erik Jensenip, Lars Aagaardillu eqqartorpaat.

Iluatsittumik ataatsimiinneq naammagisimaarlugu Erik Jensenip, Lars Aagaardillu ataatsimiinnerup kingorna oqaatigaat. Nunatsinni innuttaasunut imaani isumannaallisaaneq annertusarumallugu, suleqatigiinneq suli annerusumik nukittorsassasoq Naalakkersuisut marluullutik aalajangiusimavaat.


Annertunerusumik paasisaqarusunnermi Ineqarnermut Attaveqaasersuutinullu Naalakkersuisoqarfik attaveqarfigineqassaaq, uunga box909@nanoq.gl