AtuartigukPingaaruteqarluinnarpoq kapisilik pisarisuugaq nalunaarutigissallugu
Nassiussisuuvoq: Aalisarnermut Piniarnermullu Naalakkersuisoqarfik
Aalisartillutit kapisilimmik pisarisuugaqaruit kapisilinniarnissamullu akuersissuteqarnat, pingaarluinnarpoq pisarisuukkat nalunaarutigissallugu. Aamma pingaaruteqarpoq kapisilik atlantikup imartaaneersoq aamma kapisilik qatigattooq pisarisuukkatut pisarisimagukkit nalunaarutissallugit.
Kapisilik qatigattooq aalisaqatiminut inangiisuuvoq, taanna pisarisuukkatut nalunaarutigigukku, taassuma qanoq atsigisumik ajornartorsiutaanera pillugu nalilersuutitut ilanngunneqassaaq. Kapisilik qatigattooq nerineqarsinnaalluarpoq.
Aalisarnermi saniatigut pisat pillugit Namminersorlutik Oqartussat nalunaarutaat naapertorlugu saniatigut pisat iliuuseqarfigineqarlutillu nalunaarsorneqartassapput. Nalunaarut malillugu nassuiaatigineqarpoq saniatigut pisat tassaasut imaani uumassusilinnik pisat tamarmik aalisarnissamut akuersissummut ilaanngitsut.
Saniatigut pisat tamarmik nalunaarsorneqassapput nalunaarutigineqarlutillu. Pisat tamarmik saniatigut pisat ilanngullugit tulaanneqartassapput. Aalisarnermi saniatigut pisat pillugit Namminersorlutik Oqartussat nalunaarutaat naapertorlugu aalisarnerni allani kapisilinnik saniatigut pisat aamma iliuuseqarfigineqarlutillu nalunaarsorneqartassapput.
Kapisilinniarneq pillugu Nalunaarut naapertorlugu kapisilinniartut tamarmik nalunaaruteqartussaatitaapput. Taamatut nalunaaruteqartussaatitaanerup kinguneraa, qassutinik napittaajaasimanermi, qarsorsaq qissataalluunniit atorlugu aalisarsimanermi pisaqarsimanermilu aalisarnerup ingerlanneqarsimanera pillugu nalunaartussaatitaasoqarmat.
Aalisariarsimagaanni imaluunniit aalisarsimagaanni pisaqarnanilu susaarlunilu tamanna 0-tut taaneqassaaq nalunaarutigineqassallunilu. Kapisilittoqarsimanerani nalunaaruteqarneq tamanna sapinngisaq malillugu sukkanerpaamik pisassaaq. 0-mik nalunaassagaanni tamanna aalisarnerup matuneqarneranit kingusinnerpaamik ullut 14-init qaangiutinnginnerani pissaaq.
Piffissaatillugu nalunaaruteqarsimanngikkaanni ukiup tulliani akuersissummik pissarsisoqarsinnaanngilaq.
Nalunaaruteqarneq sullissivik.gl atorlugu uani ingerlanneqassaaq: Kapisilittatit nalunaarutigikkit. Nalunaaruteqarneq qarasaasiaq atorlugu imaluunniit immersugassaq aniseriarlugu assammik immersorlugu ingerlanneqarsinnaavoq.
Uunga nalunaassaatit: E-mail: GFLK@nanoq.gl Fax: 34 63 60